Entamu
La novena edición del Salón de la Sidre d’Asturies DOP respondió a les meyores espeutatives, cumpliendo colos oxetivos d’ampliación del númberu de llagares acoyíos a la DOP y del númberu de races de mazana reconocíes como afayaíces para la ellaboración de sidre d’esta marca de calidá.
Hai de reconocer que la incorporación de los llagares fasta agora pertenecientes a la Sidre d’Escoyeta, y l’afitamientu de Sidreríes d’Asturies, que recueye la necesidá de cuntar con sidre DOP na ufierta de les sidreríes que quieran vese distinguíes con esta marca de calidá, xunío a cambios d’actitú ya inclusu conteníos na mesma DOP Sidre d’Asturies, resultó tou un ésitu. Por eso naide nun se sospriende cuando agora plantégase algamar los cuatro millones de botelles DOP pal siguiente añu.
Pero la DOP Sidre d’Asturies non solo foi quien a xunir a llagareros y pumareros, xunió al conxuntu de la sociedá asturiana, non yá cola sidre, que ye de por sigo un ellementu identitario pa los asturianos, sinón tamién cola mazana y el campu asturianu; y féxolo aplicando un conceutu de soberanía alimentaria que mos recuerda a toos la nuesa responsabilidá a la hora consumir y la necesidá de que’l conceutu “asturianu” suponga de por sigo un valor amestáu que xenera bayura nel mesmu mediu, aidando a recostruyir el maltrechu texíu sociu-económicu nel nuesu alrodiu inmediatu.
Y ye precisamente esta afirmación social, cultural y económica de lo propio, -xunío a una bona xestión, llóxicamente- lo que desplica’l trunfu de la DOP Sidre d’Asturies. Por eso, una vegada más permitímosmos recordar qu‘en consecuencia, en cuantes a receptores de los beneficios que supón l’acoyese a l’asturianía, a lo asturiano, la DOP tamién asume un compromisu de reciprocidá si quier caltener la credibilidá. Ye necesario que la DOP Sidre d’Asturies aplique nel so mediu los mesmos valores que reclama pa sigo, y qu’asuma social y empresarialmente la reconocencia del valor de lo asturiano, qu’invierta en medios y en profesionales del país, qu’asuma la cultura asturiana en tola so espresión y que s’enfrente a la necesidá y a la reclamación d’emplegar la nuesa llingua como mediu natural d’espresión, como la sidre, y la mazana. D’Asturies, asturiana.
