La CiderCon, entamada pola American Cider Association, aconceya a sidreros del continente americanu y del mundiu nuna de les más importantes conferencies mundiales pa profesionales de la sidre
Esámenes p’algamar el títulu de pommelier, talleres, alcuentros sociales y una tastia de la sidre de más de mediu centenar de llagares cientraron l’actividá de la primer xornada d’esti eventu, nel que la Revista LA SIDRA ta faciendo contactos con llagareros d’esti llau de la mar.
Los talleres trataron de cuestiones tan importantes comu “L’arte y la ciencia d’una sidre equillibrao”, “Formación pal cumplimientu de la normativa federal”, “Márqueting dixital pa llagares” o “Vezos clave pa la salú financiera de los llagares”, ocupando tola mañana na formación de los profesionales sidreros. Darréu tuvo llugar una sesión de rede de contautos, nos que los participantes na CiderCon foron rotando por meses en función de los sos intereses, oríxenes o trabayos, dando la oportunidá de conocese pente toos ellos. Na tardi cellebróse un alcuentru especialmente camentáu pa la xente LGBTQ2IA nel que, mientres s’esfrutaba de dalgunes de les meyores sidres d’América, insistióse na emportancia de que tol mundiu s’afaye y afalóse a comunicar darréu cualisquier problema que pudieren carecer por pertenecer a esti coleutivu. El prestosu ambiente d’esti alcuentru foi el previu perfechu pa pasar depués a la ‘CiderShare’, padrocinada pola empresa de maquinaria Voran, onde más de 50 llagares compartieron la so sidre y dieron a conocer la so marca.
El díe dio muncho de si y amás de recibir la correspondiente formación y esfrutar del magnificu ambiente sidreru dende LA SIDRA tamos contentos pola cantidá de xente cola que pudimos contautar y qu’esperamos animar a venir a visitar Asturies, trayendo los sos productos a la viniente edición del SISGA. Cabe destacar el conocimientu qu’en xeneral tienen los americanos sobre la sidre asturiana, a la que conocen comu “la sidre más antiguo del mundiu”, naguando por deprender más sobre nosotros, llabor que ficimos con gustu.
