Del 9 d’avientu al 6 de xineru, los asturianos van poder brindar con Sidre Brut D.O.P. en más de 300 establecimientos del país.
Asturies Sidre Brut D.O.P. ye un eventu patrocináu pol Conseyu Regulador de la Sidre d’Asturies, que se convirtió en tou un referente pa los hosteleros del país. La promoción entama con un brinde colos medios de comunicación el día 9 d’avientu en La Casa de La Palmera, asitiada en Cabrales, 82 de Xixón a les 12:30 de la mañana y va siguir cellebrándose fasta’l 6 de xineru de 2017 en más de 300 llocales hosteleros, lo que lu convierte nel eventu más participativu de cuantos se cellebren nel país.
Con esti eventu pretendese dar puxu al consumu demientres la dómina navidiega de les magnífiques Sidres Brut asturianes con Denominación d’Orixe Protexida. Un productu asturianu auténticu, de primer calidá y ca vegada más consumíu y demandáu por asturianos y visitantes pa despidir l’añu que termina y brindar pol qu’escomienza.
Les cuatro marques de sidre Brut con Denominación d’Orixe Protexida que participen y collaboren nesta iniciativa son: Emilio Martínez (El Gobernador), Poma Áurea (Trabanco), Pomarina (Valle, Baillina y Fernández) y Prau Monga (Sidre Viuda Angelón – Pomar).
La Sidre Brut asturiana con Denominación d’Orixe Protexida pondráse a la vienta a precios bien económicos y demientres estes Navidaes podrá tastiase en tolos llocales apautaos al eventu tantu per botelles (a 12 euros la botella ) como per copes (a 2 euros la copa).
Esti añu ta rializándose amás una promoción en 8 tiendes gourmet nes que se puen tastiar gratuitamente les cuatro sidres esplumoses participantes. Los establecimientos son: Aramburu Uviéu, Llanes y Ribeseya, Coalla Gourmet, Gastropalacio, El Torrexón, Delicatesen Antonio y Crivencar Uviéu.
La campaña en puntu de vienta va siguir fasta’l 6 de xineru de 2017 en tolos establecimientos participantes, que s’atopen identificaos esteriormente con cartelos del eventu y tamién van cuntar con un cartelu presonalizáu col nome de ca establecimientu nel interior. Amás van cuntar col sofitu d’una campaña publicitaria en prensa y radio.
