Les sidres brut con DOP “Sidre d’Asturies”, Solaya, EM, Poma Áurea y Pomarina sedrán les protagonistes d’una campaña cola que se pretende dar puxu a la so presencia nestes fiestes navidiegues.
LA SIDRA.- Del 5 d’avientu al 7 de xineru les sidres brut asturianes de los llagares Quelo (Solaya), El Gobernador (EM), Trabanco (Poma Áurea) y El Gaitero (Pomarina) ufiertaránse en cuasique trescientos restoranes del país a precios económicos, que faciliten al públicu conocer esti rellativamente novedosu productu.
La ufierta de sidre brut asturiano perpasa de los 65.000 llitros, enforma poco pal potencial d’esti productu que pue competir perfechamente colos meyores xampanes, y qu’a nivel estatal atópase agora con perbones perspeutives por mor del boicot a los productos catalanes que ta entamádose dende seutores españolistes. En cualisquier casu esti postrer aspeutu ye’l más llamentable de toos, darréu que’l productu tien dos carauterístiques principales que lu fain especialmente competitivu: ye asturianu y tien muncha calidá.
Nesi sen, los asturianos tenemos qu’avezamos a asumir qu’esta triba de sidre ye tan nuesa como la natural de tola vida, y si hai daqué dubia nun hai más que prebalo pa dase cuenta de como caltién les carauterístiques propies de la nuesa sidre.
Na presentación el presidente del CRDOP “Sidre d’Asturies”, Tino Cortina comentó que les cadenes de distribuición comercial tan pidiendo más productu, y José L. Álvarez, presidente de la patronal hostelera Otea fexo un llamamientu “A defender lo nueso”, animando a los asturianos al so consumu.
