Con 207 semeyes y 61 participantes, esta edición consigue caltener unos niveles altos de participación al empar que meyora de forma notorio la calidá de les obres participantes.
LA SIDRA.- De magar la reconocencia del concursu pola Confederación Estatal de Fotografía, gracies a l’Asociación Asemeyando, esti X Concursu Semeyes LA SIDRA afayó les bases del concursu a les más altes normes de tresparencia y cumplimientu de la llegalidá vixente, lo qu’implica la presencia d’un xuráu que desixe cumplir altos estándares a la hora d’otorgar los premios, ya implica la reconocencia oficial de les 25 semeyes meyor clasificaes.
El Concursu Semeyes LA SIDRA, entamáu col sofitu del Llagar JR, conviértese amás en prácticamente l’únicu concursu con reconocencia oficial nel Estáu español de calter gratuitu pa los sos participantes. Asina mesmo conviértese nel primer concursu de semeyes convocáu n’Asturies con reconocencia oficial.
El xuráu, aconceyará’l prósimu sábadu 21 de xineru nos llocales de la Fundación Asturies XXI (Prendes Pando 11 baxu. Xixón) y el procesu ta abiertu a la llibre asistencia de participantes y xente interesao que quiera siguir de primera man el procesu.
XURÁU 10 CONCURSU SEMEYES LA SIDRA
José Pañeda. Fotógrafu profesional
Juan José Tomás. Llagar JR
Aurora Vigil. Sala de Arte Van Dyck
Carlos Suárez. Asociación Asemeyando
Luis José Vigil-Escalera. Confederación Española de Fotografía
