Como novedá,esti añu el SISGA va celebrase coincidiendo con AGROPEC
LA SIDRA.- La Casa Paquet, See de Turismu del Conceyu de Xixón, fue l’escenariu nel que tuvo llugar la presentación d’esti eventu sidreru internacional, qu’algama con esta la so catorceava edición no que ye’l mayor eventu internacional de sidres d’Asturies y un de los más importantes d’Europa.
Abrió la rueda de prensa Carmen Pérez, de la Fundación Asturies XXI, organizadora del eventu, “Una amuesa de que la cultura asturiana de la sidre ta vivo, evoluciona y vive nel siglu XXI”
A continuación, el Conceyal de Ciudadanía Guzmán Pendás espresó’l so prestu por presentar esti Salón “ye un arguyu que Xixón seya’l trubiecu que recibe una vegada más esti eventu. Eventos como esti asitien a Xixón y a Asturies como referencia internacional na sidra” animando a aquellos asturianos más “de cultura chigrera” (refiriéndose al consumu de sidre tradicional d’echar) a faer una esceición y por una fin de selmana abrir la mente a toles posibles espresiones de la sidre.
Tomó después la palabra Marcos Abel Fernández, presidente de la Fundación Asturies XXI, que destacó la gran participación de llagares de sidre de tol mundu, pesi a, como indicó, la dificultá qu’implica viaxar a Asturies “aisllada per tierra, mar y aire”.
Anque que pa munchos estos productos seyan novedosos, Marcos Abel destacó qu’en Asturies lleva produciéndose sidre d’estes característiques dende’l sieglu XIX, siendo un de los primeros países del mundu –si non el primeru- en champanizar la sidre y produciéndose tamién hai tiempu aguardientes de sidra, sidres gasificadas y otros de los productos que van vese nesti SISGA.
“Lo que pasa ye que la evolución de la sidre en tol mundu nos últimos 20 años ta llevando al restu de países al mesmu llugar nel que tamos nos hai tiempu” puntualizó.
El presidente de la Fundación resumió el programa, accesible en sisga.info, un programa enllenu d’actos oficiales, tasties, degustaciones, charres y eventos sidreros que procurarán l’averamientu de la cultura sidrera asturiana a los participantes en el SISGA. Como novedaes importantes esti añu, la coincidencia de la preba abierta del SISGA cola celebración d’AGROPEC, nel recintu de la Feria de Muestres, y la creación d’un eventu específicamente dedicáu a los productos con DOP asturianos, a traviés d’un maridaxe conxuntu de sidres asturianes con Alimentos del Paraísu.
La cita principal pa’l públicu xeneral va tener llugar el sábadu nel Salón de congresos de la FIDMA cola esposición de productos al públicu onde, por namás diez euros, non solo podrán probase toes estes sidres sinón que va tenese el privilexu de poder falar directamente colos llagareros de too el mundu.
El programa presllará col Brunch de Gala nel Llagar Finca El Duque, nel que se fadrá entrega de los Premios SISGA, que ya cuenten con un fortísimu renombre a nivel internacional y que garanticen la so ecuanimidá mediante el peculiar sistema de tener un xuráu internacional formáu polos propios llagareros participantes.
Finalmente Marcos Abel destacó la importante presencia d’autoridaes internacionales de los conceyos asociaos a la Rede Europea de Ciudaes de la Sidra “Vamos conseguir que la mazana y la sidre seyan el nesu de xunión de los diferentes conceyos que producen sidre en toa Europa”.
Pela so parte, Antonio Migoya, representante de la Fundación Caxa Rural de Xixón, collaboradora d’esti eventu casi dende los sos entamos, destacó la importancia de la sidra a nivel mundial “Nun somos conscientes de que la sidra ye’l productu que más se bebe nel mundu, lo que pasa qu’hai otres formes de beber sidra” destacando qu’esos productos son una evolución natural de la sidra na qu’hai que siguir trabayando y destacando la importancia de los llagareros d’otros países como embaxadores, yá non de la sidra asturiano, sinón de Asturies y los sos productos.
L’actu preslló con una invitación a los presentes a una copa de Sidra Riestra Brut.
El Salón Internacional de les Sidres de Gala va tener llugar del 26 al 29 de setiembre, siendo el sábadu 28 la Xornada de Tastia Abierta al Públicu, que va tener llugar nel Salón de Congresos de la Feria Internacional d’Amueses d’Asturies n’horariu de 12 a 15 h. y de 17 a 20 hores.
