“Ca llagareru que vien conviértese’n publicista d’Asturies y de la nuesa sidre”
La Casa Paquet, See de Turismu del Conceyu Xixón, foi l’escenariu nel que tuvo llugar la presentación d’esti eventu sidreru internacional, qu’algama con esta la so decimo tercer edición un récord de participación, con 92 llagares que presenten 287 variedaes de sidre estremaes no que ye’l mayor eventu internacional de sidre d’Asturies y ún de los más importantes d’Europa.
Abrió la rueda prensa Angela Pumariaga, Vicealcaldesa de Xixón, quien declaró que “Pa Xixón ye un auténticu arguyu qu’esti Salón se cellebre equí una vegada más, un eventu qu’asitia a Xixón y a Asturies como referencia sidrera internacional” destacando la importancia de la firma del Protocolu d’Adhesión a la Rede Europea de Ciudaes de la Sidra, que se va desendolcar nel Salón de Recepciones del Conceyu Xixón, siendo la anfitriona del mesmu la Sra. Alcaldesa de Xixón, Dª Carmen Moriyón y que convierte a la nuesa ciudá en centru oficial d’esta rede que va acomuñar los enfotos de toles ciudaes y rexones de tradición sidrera del continente, teniendo a Xixón y a Asturies como referente.
Sobro la sidre, Pumariega declaró que “Nun podríamos entendemos ensin la cultura sidrera”, afirmando la influencia de la cultura sidrera nel calter xixonés, “una de les coses que más resalten los visitantes que vienen a la nuesa ciudá”.
De siguío tuvo llugar la intervención de Marcos A. Fernández, Presidente de la Fundación Asturies XXI, que destacó la fortísima participación de llagares de cuasique tolos continentes –sacante Australia- pesa les grandes dificultaes de comunicación que carez Asturies y l’enorme costu económicu de traer la sidre dende llugares tan alloñaos como Xapón, Perú o Finlandia.
“Trayer 12 botelles de sidre dende Xapón, por casu, tien un costu d’alredior de 1.200 euros, lo que nun torga que cada añu más llagareros ya importadores quieran tar presentes y conocer Asturies”.
Na rueda prensa participó tamién Manuel G. Busto, Presidente del Xuráu del Salón Internacional de les Sidres de Gala, quien desplicó’l furrulamientu del concursu, l’únicu con xuráu totalmente independiente nel que los propios participantes formen parte del mesmu y nel que se consigue evitar cualisquier parcialidá pol métodu de restar la másima y mínima puntuaciones de ca tastia, fecha siempres a ciegues. Recordó tamién qu’esti concursu ye l’únicu nel que s’utiliza una clasificación afecha a la nomenclatura oficial de la sidre recoyida na llexislación 2017.
Pela so parte Juan Suárez ‘Stové’, Direutor del Muséu de la Sidre d’Asturies, que tien el Aytu de Xixón como patronu y que, per primer vegada participa nel SISGA cola presentación de la sidre xaponés el vienres 29 y una visita al MuSi, comprometióse a amosar na visita a les sos instalaciones “Por qué tamos na punta de llanza de la cultura sidrera”. Stové reconoció tamién la importancia de la sidre gasificao nel espardimientu de la sidre per tol mundu.
Na so intervención Marcos A. Fernández, presidente de la Fundación Asturies XXI, entamaora d’esti eventu, realizó un curtiu resume de les principales actividaes que van tener llugar mientres estos cuatro díis y que puen consultase na páxina web de sisga.info y lasidra.as.
A lo llargo d’estes xornaes asocederán les tasties, les charres y los alcuentros sidreros, destacando como yá se mentó la Costitución de la RECS con representación oficial internacional, una novedá ensin precedentes que reconoz a Xixón internacionalmente como see principal de la redolada sidrera europea.
La cita principal pal públicu xeneral va tener llugar el sábadu nel Salón de congresos de la FIDMA cola esposición de productos al públicu onde por namás diez euros non solo podrán probase toes estes sidres sinón que se va tener el privilexu de poder falar direutamente colos llagareros de tol mundiu.
El broche d’oru pondrá’l domingu nel Restorán El Duque col Brunch de Gala nel que se van realizar una serie de propuestes gastronómiques de primer nivel bien específiques pa maridar con estremaes tribes de sidre de les participantes nel Salón, a continuación del cual va tener llugar la esperada entrega de los prestixosos Premios SISGA.
El Salón Internacional de les Sidres de Gala va tener llugar del 28 de setiembre al 1 d’ochobre, procediéndose’l vienres 29 a la firma del Protocolu d’Adhesión a la Rede Europea de Ciudaes de la Sidra, y siendo el sábadu 30 la Xornada de Tastia Abierta al Públicu, que va tener llugar nel Salón de Congresos de la Feria Internacional de Muestres d’Asturies n’horariu de 12 a 15 h. y de 17 a 20 hores.
