Con vistes a la badea de Lluanco y nel mesmu paséu marítimu, na mesma oriella del Cantábricu, asómase El Tormentín, un restorán sidrería rexentáu dende 2015 por Guillermo Coviella que xunto al so equipu, encárguense de faer d’esti restorán un llugar privilexáu pa esfrutar de les especialidaes de la casa, como son los arroces, con bugre, con amasueles o prietu con calamares. Especial atención merézlu l’arroz con pulpu y güévara d’oricios evidentemente en tiempu d’ello y por encargu previu.
De los arroces, encárgase de tresnalos Pilar Diego, mentes qu’el pexe y el mariscu son la especialidá de Diego Busto que tresna daqué perparticular como son los llagostinos trinchaos al fornu.
Y nun escaezamos los postres, tamién de casa, que son la meyor forma de completar la propuesta gastronómica de calidá y tradición qu’alcontraremos nesti restorán.
La capacidá del restorán ye d’unes 50 presones, polo que s’encamienta reservar, sobro too pa la terraza.
Too ello armoniza perbien con sidre como Foncueva, Trabanco y Trabanco sobro la madre, Poma Áurea, Roxmut, y auguardiente de sidre del Monasterio de Corias.
Ensin dubia una carta de sidres acertada y variada que faen qu’El Tormentín seya un restorán sidrería encamentáu por LA SIDRA pola so gastronomía, calidá, tradición y bon faer.
EL TORMENTÍN. La Riba, 10 / 12 Lluanco, Gozón T. 984 491 067
