Tres trabayar varios años en chigres de la fastera, Olimpia E. Roa istálase nesti llocal que yera una antigua pulpería y escomienza asina una nueva esperiencia como rexente del so propiu establecimientu.
Pa ello faise acompañar en cocina de Daniela, ufriéndomos un ampliu menú diariu que consta d’un entrante (embutíu, muxones, verdures…) un primeru (platu de cuyar o daqué más fresco en temporada) y un segundu (carne o pexe), too ello, por supuestu, con postres –dellos caseros- y bébora.
Les fines de selmana cunten con menús d’ufierta y a la carta pexe de temporada, como’l bonitu al ayu, en tacos, al fornu, la ventrisca en salsa… tamién tresnen la merluza a la sidre y el bacalláu n’estremaes ellaboraciones. Tampoco nun falten les carnes, como’l tradicional cachopu asturianu, l’entrecot, chuletines de corderu, chuletones, etc.
Y si quier tomar un bon culín, tienen sidre de Coro o d’El Piloñu, servío en tiempu y forma.
El Senderu. Sidrería. Lluanco 15. Xixón. T. 658 795 004
