El Salón Internacional de les Sidres de Gala va a más

Más llagares internacionales, más espaciu pa la Tastia Abierta y más tasties guiaes nel VIII SISGA, del 28 al 30 setiembre

• Asistirán al congresu, amás de llagares asturianos y del territoriu español, productores de más de 10 países, ente ellos Estaos Xuníos, Reinu Xuníu, Alemaña o Xapón
• La Tastia Abierta al públicu llevaráse a cabu’l sábadu 29 setiembre de 12:00 a 21:00 hores nel Patiu los Asturcones y La Colexata San Xuan Bautista del Palaciu de Revillaxixéu en Xixón

LA SIDRA.- El Salón Internacional de les Sidres de Gala 2018 –SISGA’18- torna, na so ochava edición, a aconceyar en Xixón a ellaboraores de trés continentes de sidre de copa. L’alcuentru tendrá llugar los díis 28, 29 y 39 de setiembre, demientres los cualos, llevaránse a cabu estremaes actividaes col oxetivu de dar puxu a esti productu que díi ente díi xorrez en consumu nel mercáu internacional, asina como de xenerar xinerxes ente los llagareros participantes y ampliar les oportunidaes d’esportación.

El díi cimeru pa dar a conocer los productos de tolos ellaboraores sedrá la xornada de Tastia Abierta al públicu, el sábadu 29 setiembre. El llugar tornará ser el Palaciu de Revillaxixéu de Xixón (Plaza’l Marqués 2) n’horariu continuu de 12:00 a 21:00 hores. La entrada costará 6 euros y con ella facilitaráse una copa pa la degustación de los productos.

Esta sedrá una oportunidá única pa que’l públicu puea conocer y prebar l’amplia gama de sidre novedoso y derivaos qu’esisten nel mercáu.A destacar que nesta edición, amás de que s’acupará la Colexata San Xuan Bautista pa la Tastia Abierta, tamién s’utilizará’l Patiu los Asturcones yá que xorreció l’asistencia llagares y per ende cuasique se duplicó l’espaciu d’esibición y degustación. Asina mesmo, programárense tasties guiaes a lo llargo tola xornada que sedrán impartíes polos propios llagareros tanto nacionales como internacionales, asina como por especialistes.

Les actividaes escomenzarán el vienres 28, colos Premios SISGA’18. Demientres la mañaña d’esi díi aconceyará’l xuráu internacional nel Llagar de Castañón pa, tres la tastia, fallar los premios a les meyores sidres en ca categoría.

Esti xuráu tará compuestu por un xuráu internacional conformáu por un representante de caún de los llagares participantes, tamién por profesionales del seutor, y especialistes nesta bébora. Participarán productores d’estremaos países como Francia, Alemaña, Italia, Estaos Xuníos, Holanda, Portugal, Finlandia, Lituania, Reinu Xuníu o Xapón; y tamién habra abonda representación de llagares asturianos asina como d’otros territorios del Estáu español talos como Cantabria, Euskadi, Llión o Canaries.

Los xueces tastiarán la sidre presentao -a ciegues -y darán la so puntuación de cauna d’elles. El concursu tará xebráu n’estremaes categoríes, ente elles: sidre brut, esplumoses dulces, semiseques, rosaes, sidre de copa seco o semiseco, sidre de xelu, sidre ellaborao con otros frutos, perea, compuestes de sidre o destilaos de sidre. Asina d’ampliu ye l’abanicu de los productos que tan sacándose al mercáu, y d’ende la necesidá de valorales a toes na clas que-yos correspuende. Los premios otorgaránse esi mesmu vienres 28 demientres la Cena Gala que se rializará nel restorán Bellavista de Xixón y que cuntará cola presencia de les autoridaes llocales, tando confirmada la participación de la propia alcaldesa, Carmen Moriyón.

El domingu 30 setiembre desendolcaráse la Xornada de Sumilleres. Sedrá una tastia de calter téunicuy rializaráse de manera interactivo. Ca llagareru presentará estremaes sidres y desplicará los puntos rellacionaos col so procesu d’ellaboración, comercialización, aiciones de publicidá, de marketing y aceptación ente’l públicu. Asistirán amás enólogos, mayestros bodegueros xefs y prensa especializao al restorán El Duque en Xixón, rexentáu pola familia Baldó en Castiello Bernueces.

El SISGA ye un eventu que busca la rentabilidá, el conocimientu y l’espardimientu rial de les nueves tribes de sidre; non un simple escaparate o esibición de curtiu percorríu. Per ende esti congresu conviritiérese nun ágora na que converxe una auténtica profusión de profesionales y de conocimientos sobro esta bébora, que ca añu algama  altos estándares de calidá y que ta al altor de toles propuestes gastronómiques.

El SISGA tien una neta vertiente comercial yá qu’esti añu acudirán a Xixón empreses d’importación/esportación de EEXX, Xapón, Holanda, ect. Que ven nesti eventu una oportunidá única pa conocer de primer man les nueves tendencies del mercáu sidreru y a los porpios productores. Asina, el SISGA ufre’l marcu afayaízu pa establecer alcuerdos comerciales a nivel internacional, abriendo’l mercáu tamién a los llagareros asturianos.

VER ARTÍCULU LA SIDRA / PREMIOS SISGA’17 / VER SEMEYES DEL SISGA’17