Marcos Abel Fernandi
D’un “Principado” que fai pública espresión del so despreciu por tolo asturiano, y en concreto de la nuesa bébora patria rializando, por exemplu, los brindes oficiales con “vinu español” en cuentes de facelo como sedríe lo propio, con sidre o vinu Cangas nun cabe esperar gran cosa, pero agora, cola collechona, y gracies a les declaraciones del so direutor xeneral de Desendolcu Rural y Agroalimentación consiguieren superase, dando muestra d’una improvisación ya inresponsabilidá dafechu.
Y ye qu’énte’l caos xeneráu nun añu como esti de collecha de mazana -como cabe esperar pol problema reinal de la vecería-, el direutor xeneral de Desendolcu Rural, Jesús Casas, nun paez asumir denguna responsabilidá na tema. Incluso llega culpabilizar a los propios collecheros de la situación aniciada y esgrime sides sobro les lleis del mercáu, la ufierta y la demanda y la non intervención de l’Alministración nestos temes.
Pa entendemos, ye como si énte una andancia gripe -añalmente esperada y previsible- el responsable políticu de sanidá en cuentes de tomar les midíes sanitaries afayaíces pa facer frente a esta situación se llimitara a faltar al respetu a los pacientes culpándolos por nun tomar precauciones y nun abrigase bien.
Que nun mos engañen, el problema nun ye la collechona, el problema ye l’ausencia de les necesaries midíes de previsión, planificación, ordenamientu y proyeición de futuru del seutor. L’adolecer d’un gobiernu propiu que mire polos intereses d’Asturies y los asturianos ye’l problema, y salmos mui caro.
