Una senciella coluna en Somerset, Reinu Xuníu, ta fondamente enraigonada na hestoria de la sidre.
LA SIDRA.- Nel condáu británicu de Somerset hai un monumentu de 42,67 metros d’altor, oficialmente conocíu como’l Monumentu a Burton Pynsent”, al que tola xente de la llocalidá refierse como’l Monumentu a la Sidre”.
Alzáu a más de 200 metros sobro les praderíes de West Sedge Moor, tien 172 pasos nel so interior que conducen a vistes espeutaculares y ye un llugar perfechu pa ver la puesta de sol.
Sir William Pynsent yera un Miembru del Parllamentu en Taunton y sheriff de Somerset que fixo la so fortuna nel negociu de la sidre a mediaos del sieglu XVIII.
Naquella dómina, el gobiernu británicu taba desesperáu por consiguir dineru dempués de la Guerra de los Siete Años, asína que’l Primer Ministru John Stuart propunxo un impuestu conocíu como’l Decretu de la Sidre. L’alcol yá tenía unos impuestos bien altos, asina que Pynsent buscó l’aída del políticu más talentosu del so tiempu, el futuru Primer Ministru William Pitt, cola promesa de manda-y toles sos tierres tres la so muerte.
Pitt yera un habilidosu orador y bien respetáu pol gobiernu británicu, asina que decidió sofitar a l’amplia población de llabradores pa los cualos la sidre yera tan importante. Pitt consideraba esti impuestu inaceutable ya imposible d’asumir pola mayoría de la xente, asina que pronunció un apasionáu discursu escontra la entrada pola fuerza nos llares pa recaldar los impuestos non pagos. Hebio disturbios en Gales, Gloucester, Somerset y Devonshire y, finalmente, el proyeutu de llei foi derogáu nel Parllamentu.
Pynsent caltuvo la so pallabra y, a la so muerte en 1765, mandó tola so fortuna a Pitt, quien, n’agradecimientu, invirtió 2.000 llibres de los beneficios de la vienta de sidre en costruyir un monumentu pa la posteridá: el Monumentu a la Sidre”.
