Diego Lobo coronóse güei, 10 d’agostu, como’l ganador del Troféu MacCrimmon del Festival Interceltique de Lorient. Esti troféu, qu’axunta a los 8 meyores gaiteros de les naciones celtes, ye seña d’escelencia y profesionalidá en tol mundu.
Los 4 representantes d’Asturies participaben güei na que ye la cita que da entamu a les competiciones. Hasta equí desplazáronse Diego Lobo, Daniel Meré, Nel Cortizo y Luis Enrique Sánchez, tres un añu trabayando pa clasificase. Pa poder participar, han recibir primero’l vistu bonu de la Delegación Asturiana, que sigui’l so rendimientu musical nel país; dempués, han preparar tres pieces pal troféu: una del repertoriu tradicional bretón, otra del gallegu y otra del asturianu, d’ente una esbilla.
Davezu, los y les concursantes camuden de gaita según la interpretación; n’ediciones anteriores, el tamién ganador Fernando Vázquez Cárcaba (2022) fizo lo propio con instrumentos del so taller, pa poder amoldar la dixitación a la gaita gallega, asina como María López Carballo (2019) fizo pa tocar lo asturiano.
Sicasí, Diego Lobo, qu’abrió la competición, optó por camudar de gaita ente pieces p’adaptar l’afinación, pero non el sistema de dixitación. Esti fechu foi clave pa llevar el premiu pal conceyu d’Ayer y desempatar col so rival, el gallegu Xesús Rodríguez. Lobo interpretara en 2022 toles pieces con una sola gaita, y esta dificultá nun-y favoreció nos resultaos.
L’ayerán, director de les bandes de gaites El Gumial y Garulla fundó recién, nel conceyu Xixón, la Banda Gaites Saxum.
Dende equí, damos-y la norabona pol so trabayu, qu’agora sí, dio bien d’allegríes.
*Semeyes de Próspero Morán.
*Testu d’Aymara González Montoto.
