Los miembros del seutor sidreru defende a la bébora asturiana énte la posibilidá de Sanidá de dexar d’invertir n’eventos nos que s’ufran bébores alcóliques
LA SIDRA.- El direutor xeneral de Salú Pública del “Principado” Antonio Molejón daba dos exemplos: los festivales de sidre y de cerveza. Y ye qu’a Sanidá esmolez-y el xorreciente consumu d’alcol ente la población, n’especial, de la mocedá. Sicasí, esti argumentu nun va alcordies colos datos per parte d’otros miembros de l’Alministración. Namás val con ver nesta revista la cantidá d’argumentos daos pola Conseyería de Desendolcu Rural y Agroalimentación qu’empondera la cultura sidrera asturiana y qu’invirtieren fondos pa da-y puxu como Padremuñu Cultural de la Humanidá per parte la UNESCO. Pero eso ye namás una parte, tamién tan los hosteleros, los collecheros, amás de gran cantidá de miembros de l’Academia como Luis Benito García, que bona parte del so llabor centróse dende va años n’investigaciones de rigor sobro la sidre en toles capes de la sociedá.
De fechu, recientemente, na edición númberu 178 d’esta revista, analizábemos el códigu de l’ASSA -Asociación de Llagareros- presentáu dempués de branu. Nésti, ún de los sos puntos primordiales ye la “Garantía d’ausencia de botellón”.
¡Atención! Diz l’ASSA: “garantizar l’ausencia de botellón” sinifica qu’un actu de promoción de sidre natural nun pue devenir nun actu de consumu del nuesu productu de forma indiscriminao ya incontrolao. Les sidres tienen de ser consumíes d’una forma responsable por adultos, como siempres tuvo llugar, nun ambiente de confraternización y bones rellaciones sociales y presonales. La sidre siempres foi un ellementu de socialización perimportante de la nuesa sociedá y asina tien de siguir siendo promocionáu.ñ Por ello y como yá mencionáremos enantes, ná tien que ver el nuesu Decálogu coles fiestes de prau o otra triba fiestes y actos llúdicos. Nun tamos refiriéndomos a estos actos sinon a quellos entamaos específicamente pa promocionar la sidre” desplicaba a esti mediu l’asociación, de forma conxunto y representando la voz de tolos sos miembros. Pa cerciorase de qu’un alcuentru gastro-cultural nun se convierta nun ” botellón, l’ASSA atalanta que ye “la organización del eventu de promoción de la sidre natural, en collaboración coles autoridaes llocales onde se cellebre” deberíen poner los medios pa garantizar esta custión.
Esti puntu, perimportante pa l’Asociación de Llagareros, foi ún de lo votáu demientres el so Conceyu Xeneral, consiguiendo unanimidá. de fechu, nesi mesmu Conceyu llegaren al alcuerdu de nun participar de magar 2019 n’actos de promoción de la sidre asturiana que nun cumplan los estándares de calidá recoyíos nel Decálogu col que pretenden meyorar la imaxe y la calidá d’estos actos de promoción de la sidre natural asturian que nun cumplan los estándares de calidá recoyíos nel Decálogu col que pretenden ameyorar la imaxe y la calidá d’estos actos de promoción de sidre natural asturiana.
