La pieza col nome’l conceyu ta asitiada na Plaza Manuel Uría.
LA SIDRA.- Nava estrena nueva imaxe turística. Bautizada como’l “Culetón”, la pieza compónse de les cuatro lletres del nome la villa, na que la “V” represéntase con un vasu sidre.
La pieza ye obra d’Arturo Martínez, del Grupu Nora, y pretende resaltar el culín de sidre como referente asturianu. La primer “A” apaez ensin llínia central p’armonizar col mural de la plaza na que represéntase a un echaor y que, fasta agora, foi’l símbolu más visible de la villa.
Les lletres tán feches con chapa gruesa y policarbonatu, materiales de gran resistencia, en tonos verdes y mariellos que s’allumen al atapecer.
Juan Cañal, alcalde de la villa, desplica que con esta nueva iniciativa pretende ponese en valor a Nava, que la so marca más importante ye la sidre, y que s’asitia nel cientru d’Asturies, una zona privilexada pola so natura, paisaxe y gastronomía.
La marca turistica va presentase na Feria Internacional de Turismu (FITUR) de Madrid el prósimu 18 de xineru.
