El taller ta patrocináu pola Caja Rural y sedrá impartíu por téunicos de Campoastur
LA SIDRA.- Llega’l branu… –bono, a ver si llega de verdá- y el Clú Sierense Amigos de la Mazana entama como ca añu un cursu de frada. Llevóse a cabu na finca que’l CSAM tien nel Cuitu, n’Aramil. D’esta miente, los que s’inscribieron pudieron deprender estremaes téuniques pa llograr que los sos pumares se desendolquen correchamente. Dientru’l cursu abordárense temes como la frada en verde, qué aiciones rializar p’aidar a la fructificación, intensidá de la frada, estremar los playos de les nueves rames, esclariáu de frutos o cómo retorcigañar y arquear los cañónes.
Hai de siñalar que la frada ye una de les ferramientes a considerar p’algamar que les colleches de mazana s’estabilicen y poder combater la vecería. Claro, esti fenómenu depende d’estremaos factores, pero deprender a faer una poda correcha y afondar en métodos d’esclariáu, si que podríe redundar nuna meyora sustancial sigún reconocen los espertos.
De fechu, tanto Campoastur como la Conseyería de Desendolcu Rural al traviés de la DOP Sidre d’Asturies, tan dando puxu ca vegada más a estos talleres cola fin de faer llegar a tolos pumareros les investigaciones que tan llevándose alantre nesta materia. Eso sí, hai de destacar que’l Clú Sierense de la Mazana lleva entamando con ésitu d’afluyencia estos talleres dende va años, amás d’otros munchos rellacionaos tanto cola mazana asturiana como cola nuesa sidre.
