Gracies a les xestiones d’Asemeyando, La Confederación Nacional de Fotografía reconoz el concursu, les sos bases y los sos gallardones.
LA SIDRA.- Cuandu fain 10 ediciones del Concursu Semeyes LA SIDRA, que pretende espeyar la sidre, la mazana, el so alrodiu y la so cultura, y tres esponer añu ente añu les meyores 20 semeyes, xorreciendo en participación y en calidá de les semeyes presentaes, y con participantes y ganores d’otros países del mundiu, esti añu consolidemos el concursu y diemos un pasu alantre gracies a la collaboración de l’asociación fotográfica Asemeyando.
Y ye que dende Asemeyando xestionaren la so incluxón nos certames de semeyes reconocíos pola Confederación Nacional de Fotografía, lo qu’implica una reconocencia al concursu, a les sos bases y a los sos gallardones.
Ello supunxo afayar les bases del concursu a les más altes normes de tresparencia y cumplimientu de la llegalidá vixente. Implica la participación d’un xuráu que tien de cumplir altos estándares a la hora otorgar los premios, ya implica la reconocencia oficial de les 25 semeyes meyor clasificaes.
El nuesu concursu conviértese amás en práuticumente l’únicu con reconocencia oficial nel Estáu de calter gratuiru pa los sos participantes.
Tamos ciertos de qu’ello implicará tanto un nueu incrementu en participación como na calidá de les obres presentaes.
Los fotógrafos federaos podrán algamar puntos pal so curriculum y los non federaos nun se verán afeutaos en mou dalu, anque si nel futuru se federaren, los posibles puntos algamaos son-yos reservaos fasta esi momentu.
