Dempués de cuasique dos años al frente’l chigre, Arturo Suárez decidió camudar el nome del so negociu pa siguir xorreciendo, apostando tamién por una gran inversión nes sos cocines y un cambiu carta.
LA SIDRA.- La Pumarada, rexentada por Arturo Suárez dence fai cuasique dos años, camudó de nome. El llocal, asitiáu nua cai Juan Alvargonzález nel Barriu la Sidre de Xixón pasó a llaase El Camín Encantáu. El cambiu débese a “la moderninzación y evolución del negociu” en tolos senes. Eso si, calteniendo la so bona cocina y el tratu cercanu y familiar de tol equipu, que tan bonos resultaos-yos diere demientres tou esti tiempu. La so nueva denominación tien la so razón de ser en que, como desplica Arturo, “el propietariu del llocal ye de la fastera del Valle d’Ardisana en Llanes per onde pasa la ruta senderiega d’El Camín Encantáu y propúnxomos el nome, prestómos y punxémoslu”
L’anovación nunqueda namás nel cambiu imaxe, yá que fixeren una importante inversión na cocina y alquirieron una espectacular nevera de postrer teunoloxía pa conservar nes meyores condiciones la carne y el pexe. Amás, col cambiu d’añu, pretenden dar un xiru a la so carta, calteniendo los platos tradicionales que tantu gusten a los sos veceros, pero introduciendo dellos más vanguardistes. Un apueste que veráse refrendáu como siempres pola so espectacular cetária, d’onde salen centollos, andariques y bugres, que puen degustase tanto cocíos como a la chapa y, sobro too, les ñocles, ún de los productos más demandaos polos comensales. “ta siendo increyible, munchos veceros vienen esclusivamente a prebala por encamientu d’otros, equi’l boca a boca, está furrulando a la perfeición”, apunta perarguyosu, Artur. Tamién los muergos, llagostinos y zamburiñes tienen una gran acoyía.
Y sidre pa escoyer: Canal y, El Santu; Trabanco, normal y d´Escoyeta; J. Tomás; El Gobernador, Sopeña; Cortina, Villacubera; Estrada; Vigón; y Vallina. Un abanicu pa tolos gustos, servío en tiempu y forma.
VER ARTÍCULU COMPLETU
