L’ONCE dedica la imaxe del billete a la vía uvieina, por mor del 20 aniversariu de l’Asociación de Sidreríes de la cai Gascona
LA SIDRA.- ‘El Bulevar de la Sidrea’ ye una de les cais más emblemátiques d’Uviéu y una de les más visitaes polos turistes que visiten Asturies. Estos son solo dalgunos de los motivos polos que l’ONCE dedicó’l cupón del llunes dos de setiembre a dicha cai y al 20 aniversariu de l’Asociación de Sidreríes de la cai Gascona. Cinco millones y mediu de cupones van espublizar esti camín sidreru.
Güei presentóse’l cupón per parte de Víctor Corrolades, xefe del departamentu de Xuegu del ONCE en Asturies, y Pedro Caramés, presidente de l’Asociación de Sidreríes de la Cai Gascona. Na so imaxe representa la mítica vía apinada de presones, al pie de la so gran pipa y la ‘etiqueta #GasconaEmociona. Amás tamién allegaron al actu representantes de la Bona Confradería de los Siceratores d’Asturies.
L’Asociación de Sidreríes de la cai Gascona d’Uviéu foi constituyía n’abril del añu 1999. Anguañu cunta con 13 sidreríes, que desendolquen añalmente diverses actividaes. L’oxetivu ye que veceros y visitantes esfruten de tolo qu’Asturies pue ufiertar tantu en cultura como en tradición, alredior de la sidre, y d’otros productos gastronómicos.
L’oxetivu de ‘El Bulevar de la Sidre’ ye la promoción arrexuntada de los establecimientos hosteleros de la cai Gascona, pa consolidala como puntu turísticu y trubiecu de la sidre n’Uviéu, que refuerce la imaxe turístico y gastronómico de la ciudá.
