Ca mes vamos pidir la collaboración de tolos nuesos llectores pa contestualizar una semeya
LA SIDRA.- En más d’una ocasión comentemos qu’una fototeca nun consiste namás n’una acumuladura de semeyes, sinón que ye necesariu apurrir el mayor númberu de datos posible por que la semeya tea un sentíu nel tiempu y l’espaciu, lo qu’en munches ocasiones resulta especialmente complicao.
Nesta ocasión, la semeya pa la que pidimos colaboracón foi realizada en Nava, creemos que nel intre de la VI Fiesta de la sidre (1980), y el so autor podría ser Argüelles de Nava, o Salvador Hevia, d’Uviéu. y formaba parte del arquivu del diariu Región.
Llama l’atención el fechu de que la protagonista seya una muyer, daqué que ye abondo avezao, pero que siempres hai que destacar pa reivindicar el calter non discriminatoriu del mundiu la sidre, siquier nesi aspeutu.
La collaboración pídese pa concretar autor, fecha, llugar ya identificación de les presones qu’apaecen na mesma, bien especialmente de la echaora.
Les collaboraciones puen unviase a infolasidra.as o por whatsapp al 652 594 983
