Asturies proyeuta la criación d’una Escuela d’Echaores l’añu prósimu.
LA SIDRA.- Tino Cortina, presidente del Conseyu Regulador de la DOP anunció l’apertura d’una Escuela d’Echaores en 2018 demientres la presentación de la ruta gastronómica “El Llinderu de la Sidre de Villalegre” n’Avilés.
L’oxetivu de dicha escuela ye la formación de mayestros echaores cola fin de consiguir que seya un trabayu bien realizáu, reconocíu socialmente y bien remunerau. Esta ye una antiguu pidimientu qu’a la postre llevar´sse a cabu col sofitu de les istituciones.
“El Llinderu”, promovíu polos responsables de les sidreríes Yumay, El Chigre, La Ruta y El Corchu naz cola idea de dar puxu a una nueva ruta sidrera n’Avilés, asemeyada al Bulevar de Gascona n’Uviéu.
Tamién sirve para poner en valor la sidre Denominación d’Orixe y la mazana asturiana, yá que según un estudiu del Conseyu Regulador anguaño consúmese namá un 10% de sidre DOP.
En pallabres de Tino Cortina, esti porcentaxe tan pequeñu podría ampliase si nes mesmes sidreríes faise saber al veceru la posibilidá de consumir esti tipu de sidre, yá que en munches ocasiones ésti desconozlo. Coles mesmes, agoró que n’unos años va haber sidreríes que namás sirvan sidre DOP.
