“¿Qué esperébemos con esta donación? La inmortalidá… contar con una hemeroteca comu esta supón la posibilidá de caltener el padremuñu de todos” Marcos Abel Fernández.
“El placer de compartir unos culetes cola to xente, momentos lligaos a grandes recuerdos. Nun ye solo una bebida, ye la plasmación tanxible de daqué intanxible. Ye tradición, ye cultura, ye identidá, una forma de relacionase socialmente, un estilu de vida”. Guzmán Pendás.
“A vegaes un nun se da cuenta de que al entamar un proyectu como esti, ta construyendo Asturies” Begoña López.
La Hemeroteca de Xixón, que forma parte de la biblioteca Luis Adaro, recibió ayeri la donación de los 244 números de la revista LA SIDRA, que se sumen a los cerca de mil títulos con 35.000 volúmenes qu’abelluga esta entidá, ocupando los 1,8 kilómetros d’espaciu llinial disponibles con estanteries pa recoyer la hestoria escrita de Xixón y d’Asturies nes sos espublizaciones. L’actu de donación cuntó con una importante participación d’autoridaes y representantes de toles estayes venceyaes al mundiu de la sidre, echaores, representantes de la DOP, de los llagares caseros. de la Fundación Caja Rural de Gijón -siempre implicada nel sofitu d’eventos sidreros- y abondosa prensa.
Intervino nel actu Marcos Abel Fernández, presidente de Espublizastur, quien recordó na so intervención el nacimientu d’esta revista de la man d’un grupu d’amigos apasionaos pola sidre que, va 20 años, cuando nun esistía interné y la sidre nun tenía la repercusión mediática que tien agora, decidieron dar el pasu de sacar esta revista, inicialmente una revistina de 16 páxines qu’agora llega a los cien mensuales y que ye un casu únicu de continuidá, dende lluéu n’Asturies, probablemente nel estáu y, si falamos de sidre, ensin dubia nel mundiu.
El presidente de la revista tuvo pallabres d’agradecimientu a los llagareros, entamando por Samuel Trabanco, el primeru en sofitar -aún con dudes- esti proyectu; estendió el so agradecimientu a tolos llagareros, la DOP y a los chigres, ensin quienes non solo la revista, sinón la cultura sidrera mesma nun sedría posible.
“¿Qué esperébemos con esta donación? La inmortalidá… contar con una hemeroteca comu esta supón la posibilidá de caltener el padremuñu de todos” declaró Marcos Abel, refiriéndose a la importancia de que d’agora y pal futuru la hestoria de los venti caberos años del mundiu de la sidre te disponible pa tolos asturianos nos fondos d’esta hemeroteca.
Darréu faló Guzmán Pendás, conceyal de participación Ciudadana, Mercaos y Consumu, quien agradeció el llabor de LA SIDRA nel caltenimientu de la cultura sidrera, asina como la donación d’exemplares. La sidre, declaró “Ye parte del nuesu ADN y el meyor aliau en momentos de espardimientu” pero, matizó, “Más importante que l’olor, el sabor, la temperatura, ye’l contestu en que la tomes, polo que la cultura asturiana nun se podría entender ensin un componente espiritual, daqué más allá de lo tanxible, que nun se pue percibir col paladar, sinón col alma; un símbolu d’identidá de los asturianos”.
Eduardo Nuñez, archiveru municipal fizo darréu una breve intervención na qu’introduxo a los presentes na historia de la hemeroteca de Xixón, la so singularidá ya l’interesante periplu que la llevó hasta los baxos de la Antigua Escuela de Comerciu, faciendo ver la importancia de que LA SIDRA forme parte d’esi importante llegáu.
Finó l’actu la Directora Xeneral d’Agricultura , Agroindustria y Desendolcu Rural Begoña López, agradeciendo y reconociendo l’importante llabor de la revista “A vegaes un nun se da cuenta de que al entamar un proyectu como esti, ta construyendo Asturies” destacó, anantes de remembrar qu’aniciatives comu estes son les que nos permitirán algamar el reconocimientu de Padremuñu Inmaterial de la Humanidá el prósimu payares.
Punxose’l ramu al actu compartiendo unes botelles de sidre DOP, echaes pol Campión d’Echaores Wilkin Aquiles ya l’equipu de la Sidrería La Montera Picona, ya un brindis coleutivu acompangáu d’un pincheu a cargu de la Escuela d’Hostelería de Xixón.
Xúnete al nuesu canal de WhatsApp
