Asina describen los profesionales del seutor a la sidre espuesto n’Enofusión y Madrid Fusión.
La sidre despidise de Madrid Fusión y d‘ Enofusión sosprendiendo pola so calidá, saborgu y capacidá p’harmonizar con un ampliu abanicu de cocines. Sumilleres, restauraores, xefs y prensa especializao pudieron comprobar la calidá de les distintes marques de sidre que s’ufiertaron nos espositores asturianos asitiaos en ca planta del eventu.
La sidre DOP foi tou un ésitu nel stand d’Enofusión y tamién nel llamáu Enobar. Una sala onde los asistentes podíen tastiar los estremaos productos que partciparon na feria. “Marca una diferencia con otres sidres que se conocíen. Ye un productu distintu anque lleve’l mesmu nome. Tamién se valora munchísimo que ye natural” desplica Reyes Ceñal xerente del Conseyu Regulador.
La sidre asturiano recibió numberosos afalagos demientres les trés xornaes: bébora enfrescante, que darréu esprende golor y saborgu a mazana, amable y que convida a esfrutar de la gastronomía, fueron dalgunos d’ellos. “Llama l’atención la so suavidá, pesia tar ellaborada con variedaes ácedes de mazana. Y eso sospriende y la xente valóralo. La sidre esplumoso tamién rompió dafechu los esquemes que sobo ella teníense enantes” siñala Ceñal y amiesta: “amás los especialistes destacaron la so capacidá pa maridar con productos bien distintos, polo qu’ufierta un marxe interesante, yá que puede llegar a munchos consumiores.
Nesta tercer xornada, ensin dulda, la meyor tastia-maridaxe tuvo llugar nel stand de Grupu El Gaitero. La sidre brut Pomarina harmonizó coles ostres de acuEO. Un manxar que dengún asistente quería dexar pasar. “Les ostres rellaciónense de siempre con bébores esplumoses de calidá. Y agora qu’hai sidre brut, pos qué meyor qu’ufiertar estos dos productos asturianos que son de lluxu, pero a un preciu algamadizu” indica Nuria Núñez, de acuEO.
Y nesti postrer díi, Bruno Lombán de Quince Nudos recibió tol sofitu de los sos amigos y compañeros d’oficiude mientres l’II Campeonatu Internacional Joselito a la meyor croqueta. El primer premiu foi para Jesús Segura, de La Barra de Trivio (Cuenca). Sicasí, tar dientru de los seyes finalistes ye “tou un honor” dixo Lombán. Arropándolu tuvieron Jaime Uz d’Arbidel, estrella Michelin; y Diego Fernández, del restorán Regueiro, ganador el pasáu añu del citáu certame. “Tar equí ye dar a conocer la nuesa marca. Amás la sidre ye única, hai que saber da-y el valor y la importancia que tien” manifestó’l chef pa la revista LA SIDRA.
sidre, sidra, sidro, cider, cidre, sagardoa, Apfelwein, Píngguǒ jiǔ, cidro, siideri, seidr, leann úll, Saidā, sider, jablečné víno, jabłecznik, sydr
