Devoción por y pa la sidre nel SISGA’18

Ensin dulda el SISGA consolidóse como’l principal alcuentru sidreru internacional del país, esti añu presentáronse alredor de 100 productos provenientes de más de 11 países, 4 Comunidaes Autónomes y d’una docena llagares asturianos

LA SIDRA.- A esautamente una selmana de celebrar la primer xornada del VIII SISGA, ye momentu de frenar un pocu y cavilgar sobro lo que mos enseñó esta postrer edición del Salón Internacional de les Sidres de Gala. De primeres, débese destacar qu’esti ye un alcuentru que se consolidó como’l principal d’esti tipu de bébores en tol territoriu estatal. Por casu, el conceyal de Turismo Jesús Martínez Salvador señaló demientres la so intervención na Cena Gala del pasáu vienres: “Dientru del nuesu plan d’aición de Turismu, la sidre, la nuesa bébora más propio, ye un de los pegollos estratéxicos que marca la política turística. Y dientru d’esos eventos, el SISGA ocupa un papel importante yá que xunce dellos ellementos que pal nuesu xuiciu facer distintu y especial. El primeru d’ellos ye que ye práuticamente l’únicu alcuentru de la sidre que nun se centra na d’echar, sinón que mos dexa probar toes aquelles sidres  de primerísimu nivel qu’inda nun son tan conocíes pa la mayoría de la población asturiana. Amás dexa conocer los estupendos productos que s’ellaboren nesta tierra, pero tamién munchos otros que pertenecen a otres rexones del mundu y que ye difícil tastialos n’un mesmu llugar. Coles mesmes fai posible que puedan surdir rellaciones y alcuerdos comerciales ente productores, distribuidores y consumidores finales, colo cual tien una fonderada económica que consideramos rellevante”. Amás, demientres esa cena, l’alcaldesa de Xixón Carme Moriyón quinxo estimar presonalmente a los entamaores del SISGA por esti trabayu que ye, dixo “de corazón, de sentimientu y de devoción pola cultura sidrera”.

VER SEMEYES CENA GALA

Asina, alredior de 1.000 presones acudiero a la Tastia Abierta que tuvo llugar nel Palaciu de Revillaxixéu. A solliniar que por cuenta de que xorreció la cantidá de llagares internacionales, esti añu cuasique se dobló l’espaciu espositivu, polo qu’amás de La Colexata de San Xuan Bautista del citáu edificiu, tamién s’utilizo’l Patiu de los Asturcones. Y non solo se cuntó cola presencia de 11 países ellaboradores, más de 130 productos, 4 Comunidaes Autónomes, y una docena de llagares asturianos; tamién tuvieron espacio empreses que se desendolquen nel arrodiu sidreru como COEM Astur, marmiellaes La Fabariega, el cáterign d’Estefanía Ferreras, Ingeplus o’l Clú Sierense d’Amigos de la Mazana.

VER SEMEYES TASTIA ABIERTA

Tocántenes a los premios que se fallaron el vienres 28 nel Llagar Castañón, los ellaboradores d’Asturies llograron 18 premios dientru les 16 categoríes de les que se compunxo’l concursu. En total, de los más de 130 productos presentaos, 38 sidres fueron gallardonaes provenientes d’Alemaña, Letonia, Francia, Holanda, Italia, Finlandia, Reinu XXuníu, Estaos Xuníos; tamién d’Euskadi y, como se señaló, d’Asturies. Sidres que pudieron tastiase esa mesma nueche na Cena de Gala del restorán Bellavista na qu’estos productos harmonizaron con platos asturianos y de vanguardia pa demostrar que la sidre ta al altor de cualisquier propuesta gastronómica. Los productos gallardonaos quedaron como vienen darréu:

VER SEMEYES PREMIOS SISGA

• Meyor sidre de copa seco: Primer llugar, Cider Apfel del llagar Pica Pica d’Alemaña. Segundu llugar 1947 de Viuda de Angelón d’Asturies. Tercer llugar Beer cider Dry hopped de Bear cider d’Holanda
• Meyor sidre de copa semiseco: Primer llugar, Mr Plūme de Letonia. Segundu llugar -y Généroux de Domaine de la Mare de Francia. Tercer llugar Cidre Mauret de Francia.
• Meyor sidre brut: Primer llugar, Atopa Cidre Brut Artisinal de Francia. Segundu llugar Guzmán Riestra Brut Nature d’Asturies. Tercer llugar Prau Monga DOP de Viuda de Angelón d’Asturies
• Meyor sidre esplumoso semiseco: Primer llugar, Cidre Matterhorn del llagar Maley d’Italia. Segundu llugar Avalon sidre extra de Trabanco d’Asturies. Tercer llugar Viuda de Angelón Sidre Brut d’Asturies.
• Meyor sidre esplumoso dulce: Primer llugar, Cidre Doux de Ecusson de Francia. Segundu llugar Llagar de Camín de Trabanco d’Asturies. Tercer llugar Pomar de Viuda de Angelón d’Asturies.
• Meyor sidre de xelu: Primer llugar, Diamantes de xelu de Viuda de Angelón d’Asturies. Sesgundo llugar Ice cider de Kuura Cider de Finlandia. Tercer llugar Sidre de hielo Panizales d’Asturies.
• Meyor perea: Primer llugar, Cidre Poire de Ecusson de Francia. Segundu llugar Cider Apfel Birne de Pica Pica d’Alemaña. Tercer llugar Perry de Hogan’s Cider del Reinu Xuníu.
• Meyor llicor de sidre: Primer llugar, Liquore al sidro di mela de Maley d’Italia. Segundu llugar Manzina Liqueur de Pomme vierti de Txopinondo d’Euskadi. 
• Meyor auguardiente: Primer llugar, Salvador del Obispu de Casería San Juan del Obispu d’Asturies. Segundu llugar Bear Cider Distillate d’Holanda, tercer llugar Oukaged Hogan’s Apple Spirit de Hogan’s Cider – Reinu Xuníu
• Meyor sidre con saborgos: Primer llugar, Wild Apple de Lion Ciders d’Alemaña. Segundu llugar Cidre Pêche de Ecusson de Francia. Tercer llugar Cidre Cerisse de Ecusson de Francia.
• Meyor sidre rosao: Primer llugar, Cidre Rosé de Ecusson de Francia. Segundu llugar Pomar Rosée de Viuda de Angelón d’Asturies. Tercer llugar, La Naveta Roxa de Paca y Tola d’Asturies.
• Meyor cóctel de sidre: Primer llugar, The Pippa cóctel de mazana al vermut de The Pippa d’Asturies; y segundu llugar, Kalipoko de Txopinondo d’Euskadi.
• Meyor aperitivu de sidre: Primer llugar, Roxmut de Castañón d’Asturies. Segundu llugar Alma de Trabanco d’Asturies. Tercer llugar Viesk de Panizales, tamién Asturies.
• Meyor sidre de fueu: Caldia de Panizales d’Asturies 17
• Sidre más orixinal: Seaweed Cidah Wild Fermented de Urban Farm Fermentory d’Estaos Xuníos.

Finalmente, ye d’obligada necesidá mentar la Xornada de Sumilleres que tuvo llugar nel restorán El Duque en Castiello Bernueces. Xuna cata de calter técnicu que se realizó de manera interactiva. Ca llagareru presentó los sos estremaos productos y desplicó los puntos rellacionaos col so procesu d’ellaboración, produición, medios de distribución, posibilidaes de mercáu, medios de distribución, comercialización, acciones de publicidá, de marketing y aceptación ente’l públicu.

VVER SEMEYES XORNADA DE SUMILLERES

Y claro, nun podíamos escaecer el calter festivu de la sidre. D’ende que demientres estos trés díes del eventu, los participantes pudieron esfrutar de ‘una nueche cola sidre natural a la qu’allegaron a distintos chigres de la ciudá. Lo mesmo que d’una espicha d’hermandá nel llagar Piñera dempués de la Tastia Abierta y otra más ellaboradora pola chef Estefanía Ferreras pa concluyir la mañana na que’l xuráu internacional valoró les sidres presentaes. Y claro, nun podemos escaecer que, pa poner el ramu, el restorán El Duque cellebró –como non– otra comida más, otra espicha, sí otra espicha, pero con un toque de preparación moderno que-y dio un toque distintu a estes postrera tarde del Salón Internacional de les Sidres de Gala.