Siguimos espublizando lo que piden pa esti añu los principales actores de la sidre n’Asturies.
LA SIDRA.- La DOP Sidre de Asturies y l’Asociación de Sidres Asturianes dícenmos cuálos son los sos deseyos pa la sidre nesti 2017. Daniel Ruiz, xerente del CRDOP manifiesta: De primeres, gustaríamos ver al seutor de la sidre xuníu y promocionando conxuntamente’l nuesu productu más emblemáticu y simbólicu. De segundes, gustaríamos que’l seutor siga anovando nos nuesos productos pa faelos más competitivos y globales pa lo que ye fundamental qu’un nuevu marcu llegal pa la sidre vea la lluz (nueva normativa de calidá de sidre). Y en cuanto si nel so muerganismu tiense dalgún proyeutu pal prósimu añu respondió que: Esti añu vamos acreditamos na ISO 17065 que mos dexará certificar productu amparáu sidre d’Asturies DOP sigún los estándares europeos afitaos. La principal prioridá va ser promoción, promoción y promoción de DOP.
Pela so parte, María Cardín, presidenta de la ASSA declara:
“El nuesu primer deseyu pal 2017 ye l’aprobación de la nueva Norma de calidá de Sidre, lo qu’apurriría nuevos consumos pa les nueves sidres que podríen ponese nel mercáu: Sidres naturales esplumoses nes sos distintes versiones, sidres ensin alcol, sidres de baxa graduación alcólica, sidres dulces, sidres light, sidres baxes en caloríes, sidres arumaes o con zusmios d’otres frutes, sidres de xelu, cocteles de sidre, etc. Esta nueva NC pa la sidre va suponer pa la sidre asturiano un nuevu marcu de desendolcu de nuevos productos y con ello la posibilidá de nuevos mercaos de consumidores que güei nun consumen les actuales sidres, y con ello más negociu pa tol seutor tresformador y productor de mazana n’Asturies. Otru deseyu ye la profundización na comercialización de les sidres naturales nel mercáu español. Tamién que’l preciu de la sidre nel puntu de vienta tea más d’acordies col braeru valor que tienen los nuesos productos. Que finalmente y d’una vegada per toes, en tolos actos oficiales que se cellebren n’Asturies y nos que se sirva un cóctel, les sidres ellaboraes n’Asturies tean presentes nos mesmos en llugar destacáu”.
