El nuevu responsable afirma que ye ún de los retos más importantes de la so trayeutoria profesional.
LA SIDRA.- El Conseyu Regulador de la Denominación d’Orixe Protexida (DOP) Sidre d’Asturies yá anunció quién va ser el nuevu xerente de la entidá. Ye Daniel Ruiz, quien tien una dilatada trayeutoria profesional, con espericia empresarial tres ocupase de la xerencia de l’Asociación de Mozos Empresarios (AJE ASTURIES), ser xefe d’equipos de la Rede de Telecentros de la Fundación CTIC, y de trabayar como direutor de proyeutos y de xerente en diverses empreses privaes como Transcom World Wide, Sony Computer Entertainment o Europe, ente otres.
El Conseyu Regulador va siguir cola llínia de trabayu de los postreros años basada nel esfuerzu del posicionamientu de la marca certificada, l’aumentu de les vientes nel mercáu interior, y al mediu plazu, el procesu d’internacionalización pa xorrecer en competitividá y valor.
El xerente del Conseyu Regulador asume’l que considera ún de los retos más importantes de la so trayeutoria profesional con “ilusión y responsabilidá” y coles mires de “siguir trabayando n’unidá d’aición con collaboradores y productores porque xuntos vamos algamar, ensin dulda, los oxetivos que mos afitemos”, afirma Ruiz.
