Tino Cortina, presidente de la DOP Sidre de Asturies, fai balance de los principales llogros de la marca de calidá, dientru pocu van rializar elleiciones
LA SIDRA.- El prósimu 15 de mayu van cellebrase elleiciones na DOP Sidre d’Asturies pa escoyer a una nueva direutiva. Pa la so realización hai que desplicar que llévense a cabu dos censos: llagares y pumareros. De caún d’ellos debe de salir escoyida una candidatura con seye vocales titulares y trés suplentes, votaos polos representantes de ca censu. El muérganu de gobiernu va formase con doce integrantes, seyes de ca seutor, qu’amás tendrán d’axuntar ciertos requisitos por que representen fielmente al conxuntu de tolos integrantes del censu, como volume, o tribes de productos ellaboraos, ente otros.
Tino Cortina ye l’actual presidente de la DOP Sidre d’Asturies y nun se va presentar de nuevu pal cargu. “Yo entiendo que se cumplió una etapa y agora tien d’aportar otra presona. Foi tou un honor representar a esta Denominación d’Orixe, pero creo que l’alternanza ye bien sana. Sacántenes esceiciones, yo creo que la xente que se perpetúa nun cargu nun fai bien a la istitución. La DOP ye de tolos asturianos y que la presidencia camude de manos ye un síntoma de salú democrático” manifiesta.
Al pidi-y un balance de la so etapa como presidente señala: “Demientres toos estos años intenté dar el másimu y quedo con tolo bono consiguío demientres esti tiempu, que ye enforma. Tamién con tola xente bono y comprometío que conocí. Los momentos malos, que tamién los hebio, cárgolos na mochila del deprendizaxe presonal. Eso sí, ye duro ver como inda hai unos pocos que por intereses presonales, políticos o a cencielles por envidia o egu, siguen metiendo palos na rueda, mentes de cara a la opinión pública álcense como salvadores de la patria. Por suerte la Denominación d’Orixe yá nun ye un proyeutu, sinón una realidá, imparable”.
Tamién entrevistemos a l’actual vicepresidenta de la DOP, la pumarera Belén García. En prósimos díis vamos espublizar una nueva entrada coles sos declaraciones. Sicasí, la entrevista completa a Cortina y a García puede consultase nel siguiente enllaz: https://www.lasidra.as/la sidra-202-febreru21/
