La presentación del eventu tendrá llugar güei ales 12 hores na Casa de la Palmera en Xixón.
La Tastia Abierta al públicu cellebraráse’l sábadu 30 setiembre de 12:00 a 21:00 hores na Colexata de San Xuan Bautista en Xixón.
LA SIDRA.- Un añu más torna una de les cumes más importantes de les sidres de copa a nivel mundial. Los prósimos díis 29 y 30 setiembre y 1 d’ochobre, los llagares de 15 países de cuatro continentes daránse cita nel VII Salón Internacional de les Sidres de Gala -SISGA 2017–, un alcuentru nel qu’ellaboraores de másima proyeición muestren y ufren los sos productos más destacos ya anovaores nun congresu apináu d’actividaes tanto pa productores como pal públicu en xeneral.
La presentación oficial sedrá güei na Casa de la Palmera en Xixón a les 12 hores, cola rialización d’una rueda prensa na que se desplicarán tolos detalles del eventu. Intervendrá Carme Pérez, de la Fundación Asturies XXI -entamaora del eventu-; Jesús Martínez Salvador, conceyal de Turismu, Esportes, Xuventú y Festexos de Xixón; y Celestino Cortina, presidente del Conseyu Regulador de la DOP Sidre d’Asturies, ente otros.
La Tastia Abierta al públicu sedrá’l sábadu 30 setiembre na Colexata San Xuan Bautista de Xixón, de 12:00 a 21:00 hores. Tolos ellaboraores cuntarán con stands diferenciaos nos qu’amosarán y darán a prebar los sos productos.
Demientres los tres díis del VII SISGA la Fundación Asturies XXI proyeutó un completu programa d’actividaes pa da-y puxu y afondar nesta bébora, los detalles de cauna d’elles daránse a conocer na presentación enantes mencionada.
Per otru llau, y pa facer frente a les munches actividaes entamaes, la Fundación Asturies XXI vien d’entamar una campaña de Voluntariáu pal SISGA que permita participar a aquelles presones que quieran collaborar col proyeutu.
