Esti añu repartiránse gratuitamente ente la población corverana cientos de llitros de sidre dulce y más d’una tonelada de castañes amagostaes.
LA SIDRA.- Los amagüestos en Corvera son daqué más qu’una tradición que se caltien dende tiempos inmemoriales, convirtiéronse n’auténtiques fiestes de les que participen tolos vecinos del conceyu y que se viven con gran entusiasmu. Por ello, amás d’en ca collación, el Conceyu tamién ufierta un amagüestu popular que se va cellebrar el sábadu 12 payares, de magar les cinco y media la tardi, na plaza de Los Mayestros de Les Vega. En casu d’augua treslladaráse al interior del Cientru Tomás y Valiente. Nesta fiesta repartiráse media tonelada castañes amagostaes gratuitamente y quinientos llitros de sidre dulce. L’eventu va tar amenizáu poles actuaciones de la charanga El Felechu.
Trasona foi la primer collación que cellebró’l so amagüestu el sábadu 5 payaes, pero la prósima fin de selmana, el mesmu sábadu 12, amiéstase a la convocatoria d’esta festividá l’Asociación de Vecinos “L’Aldea de Villa”. Dende les siete la tardi van repartise 70 quilos de castañes amagostaes y 150 llitros de sidre dulce. El vienres 18 payares llegará-y el turnu a la collación de Molleda que cellebrará’l so amagüest de magar les ocho la tardi na pista poliesportiva.
El sábadu 19 la fiesta alrodiu les castañes y la sidre dulce va tener llugar nes collaciones de Los Campos, Cancienes y Campañones. Nel casu Los Campos, la repartía de más de 60 quilos de castañes ente los vecinos sedrá dende les seyes de la tardi nel Cientru Cultural. Cancienes va cellebrar la so fiesta tamién dende les seyes, na see de l’asociación de vecinos, onde van distribuyise gratuitamente 50 quilos de castañes pa darréu cellebrar un baille. Campañones tamién va amestase a la tradición a lo llargo de tola tardi cola convocatoria d’una xinta d’hermandá.
