La Fundación Asturies XXI convoca places de voluntariáu pa collaborar nes actividaes del 14º Salón Internacional de les Sidres de Gala
LA SIDRA.- La Fundación Asturies XXI, entidá organizadora del Salón Internacional de les Sidres de Gala, que cunta cola collaboración de la Conseyería de Mediu Rural, el Conceyu de Xixón, LA Fundación Caxa Rural de Xixón, la Escuela Hostelería y Turismu de Xixón, la Cámara Comerciu de Xixón, y de xacíu, de la revista LA SIDRA, realizó una convocatoria de voluntariáu pa collaborar en qu’esti eventu sidreru internacional que se celebra en Xixón del 26 al 29 setiembre, tea los meyores resultaos.
Como entidá declarada d’utilidá pública, la Fundación Asturies XXI rializa esa convocatoria que permite la participación nel eventu como voluntariu/a colos beneficios qu’ello trai; ello ye, dende participar en primer persona y dende dientru nel eventu, con contautu directu con llagareros de tol mundiu, fasta compartir xintes de trabayu y espiches convocaes, pasando pol llogru d’etiquetes d’estos llagares internacionales y entrar na repartición de sidre sobrante.
Les xornaes a cubrir son del 26 al 29 de setiembre, siendo opcional participar nes cuatro xornaes o n’eventos por separtáu, siempres en función de les posibilidaes y/o interés que se tea nes actividaes programaes, y de les necesidaes organizatives del SISGA.
Les persones interesaes en participar en calidá de voluntariáu tienen de comunicalo per whatsapp al teléfonu 652 594 983, poniendo VOLUNTARIU/A 14 SISGA, y la Fundación Asturies XXI pondráse en contautu colos interesaos, fasta cubrir el cupu de voluntariáu.
Esta décimu cuarta edición del Salón Internacional de les Sidres de Gala cunta esti añu con un escepcional programa, y va aumentar la posibilidá de participar nel mesmu, fasta agora llindada a la xornada de Tastia Abierta, nes estremaes actividaes programaes, anque con places llindaes.
Pa recibir el PDF de la revista fai falta tar dau d’alta nel whatsapp de LA SIDRA. ¡Gratis!!
