Participaron 41 llagares na XXXII edición del prestixosu certame maliayu
LA SIDRA.- Foi una final mui reñía. Cabríe camentar que con 10 xueces puntuando de 6 a 10 puntos ca sidre, diba ser complicao que hubiere un empate. Pero sucedió. Les botelles 1 y 2 algamaron igual valoración. Eso sí, na postrer ronda, na definitiva, quedó bien nidio la venceora del certame: Sidra Contrueces. Un sosprendíu Iván Rubiera xubía al esceneraiu pa recibir el premiu pol que la so sidre foi la Meyor Sidre d’Asturies nel XXXII Concursu de Sidre de Villaviciosa. Un gallardón con marcáu prestixu.
El concursu entamó a les seyes de la tardi na Plaza’l Güevu de Villaviciosa. Fueron 41 los llagares que participaren. Pa poder tastiar con rigor dafechu los culinos de sidre, el campionatu xebróse en varies tandes. Primero féxose una elliminatoria na que namás pasaron 15 de les participantes. Darréu rializóse otra más na que s’esbillaron 6. Ye importante siñalar que pa ca sidre usóse un vasu distintu col oxetivu de nun trestocar en dengún intre les propiedaes organoléptiques de la sidre.
Yá na postrer preba, la media docena sidres escoyíes tastiáronse en dos tandes diferentes y nes que s’intercamudó l’orde de les botelles. Les puntuaciones taramingaron ente los 146 y los 166 puntos. Pal desempate, féxose una nuea degusación final na que la pirmer de les sidre algamó una nota de 9 y sobro esa puntaución dábase-y un 8 o un 10 a la cabera, que ganó por goleada.
