Tres la perinteresante xornada d’ayeri, cola intervención de Joaquin Whitter, Lujó Semeyes y la tastia guiada de sidre y quesu ocitarnu, güei toca-y el protagonismu al cocineru Lluis Nel Estrada, el activista sidreru Eduardo Coto y la sidre portuguesa y asturiana.
LA SIDRA.- L’Arcu Sideru Atlánticu entama güei la so segunda xornada, dempués d’un estupendu entamu na xornada d’ayeri onde amás de la esposición de semeyes del X Concursu LA SIDRA, tovieren llugar interesantísimes intervenciones, como la del diseñador de la nueva etiqueta de Sidra El Duque, Joaquin Whitter, o la esperada conferencia de Lujó Semeyes al rodiu de la sidre na fotografía que dexó a tol mundiu con ganes de más. La tastia guiada de sidre y quesu ocitanu resultó tamién un auténticu ésitu que finó con un brindis ente los participantes.
Pa la xornada de güei los actos entamarán como davezu a les 19,30, nesti casu cola charra “La sidre na cocina” por parte de Lluis Nel Estrada. Cocineru, especializáu en gastronomía y comunicación, marketing gastronómicu y agroalimentariu, que tien espublizaes fasta agora cuatro obres: “ Con Tastu a Sidra”, “Cocina Tradicional Asturiana en Cuatro Estaciones”, y “Cuarenta Quesos, Cuarenta Platos”, esti postreru supúnxo-y la reconocencia como Queseru Mayor d’Asturies nel añu 2006.
Dempués de la so intervención corresponderá-y el turnu a Eduardo Coto, xerente de Guerrilla Imports, especializáu en sidre y activista internacional, que fadrá una tastia guiada de sidre portuguesa (Corrupia) y asturina (Españar) harmonizao con quesu portugués.
Ye preciso esclariar que les tasties guiaes, por sistema, tendrán llugar una vegada finada la intervención principal, y non necesariamente a les 21:00 h. como apaez en dalgún programín.
