La DOP y Otea: “Poner el güeyu en campañes o festivales de promoción de la sidre criminaliza indebidamente’l so consumu moderáu y responsable”
LA SIDRA.- Dos organizaciones del país, OTEA y la Denominación d’Orixe Protexía dieren la so opinión nun comunicáu tres la presentación de los resultaos de la IV Encuesta de Salú p’Asturies sobro los encamientos de Salú Pública a les istituciones públiques na que se ponen en custión les inversiones públiques a festivales de sidre y cerveza, darréu que fomenten vezos nun saludables. Darréu espublizamos la so posutura:
“Tanto dende Otea como dende la DOP Sidre d’Asturies nun discutimos n’absolutu les concluxones téuniques del estudiu, pero sospréndemos y moléstamos que s’incluyere na presentación de les sos concluxones elcomentariu sobro los festivales de Cerveza o Sidre. Creyemos que foi una declaración daqué desafortunada pues tanto la sidre como la cerveza son, precisamente, les bébores que tienen la menor gradación alcólica del mercáu. Atalantamos qu’hai actuaciones muncho más necesaries y urxentes p’amenorgar l’alcolismu ente la sociedá asturiana, como podríe ser la llucha escontra’l botellón onde, n’efeutu, el consumu d’alcol si ye esmoleceor.
Poner el güeyu en campañes o festivales de promoción de la sidre criminaliza indebidamente’l so consumu moderáu y responsable, apuntando direutamente a unos consumidores que precisamente demuesen una vegada tres otra ser los más coscientes y respetuosos pa consigo mesmos y tamién pa colos demási.
Esiste amás un decálogu de recién creación, onde l’Asociación de la Sidre Asturiana rescampla de forma nidia cuales son les normes que defende’l seutor pa dar puxu a la sidre n’Asturies, razón de más pa reiterar lo poco afayaízo de que se tresllade la idega de que ye la sidre una de les xides de la propagación del alcolismu ente los consumidores asturianos.
Pero ye que nel casu la sidre natural, tenemos que considerar que tamos falando d’una bébora cuyu consumu moderáu, pue ser saludable y con munches propiedaes beneficioses pa la salú, talo y como se recueye nes conclusiones del trabayu d’investigación rializáu en 2015 pol Departamentu de Bioloxía Funcional de la Universidá d’Uviéu en collaboración col CR DOP Sidre d’Asturies y nesl que desplica que:: Eleva’l tonu vital, el tonu afeutivu y meyora los procesos cognitivos. Amás, el consumu moderáu exerce una función proteutora del aparatu vascular frente delles patoloxíes.
