Mañana entama’l XIII Salón Internacional de les Sidres de Gala –SISGA-, l’alcuentru de profesionales del seutor sidreru qu’aconceya a 92 llagares de tol mundiu, siendo un referente internacional del mercáu de la sidre, pero que tamién permite al ciudadanu común esfrutar de delles de les sos actividades, ufriendo al públicu xeneral una importante bayura de productos sidreros
El programa d’actividaes del SISGA ye intensu y completu, tratando de dar a los participantes internacionales del mesmu la visión más amplia y veraz de la cultura sidrera asturian. Pero tamién queremos averar l’actualidá sidrera internacional a los asturianos. asina que si cenciellamente tas en Xixón a lo llargo d’estos díes puedes aprofitar dalgunes d’estes propuestes sidreres y averate al panorama más internacional de la nuesa bébora.
Ensin dubia, la meyor opción pa conocer les sidres del mundiu presentes en Xixón esti fin de selmana ye la Tastia Abierta al Públicu, un puntu d’alcuentru con sidres de cuatro continentes que costitui una oportunidad única de tener, polos diez euros que cuesta la entrada, una imaxen global de la efervescente actualidá sidrera mundial, cola opción de prebar fasta 287 variedaes sidreres de la man de los sos propios ellaboraores o incluso mercar dalgunos de los productos: sidre brut, esplumoso, tranquilo, de xelu, de fuéu, semiseco, en vermú o auguardiente, pente otres opciones.
Sedrá nel Pabellón de Congresos de la Feria Internacional de Muestres d’Asturies, n’horariu de 12 a 15 y de 17 a 20 hores.
Amás de la esposición y tastia de productos, esa mesma xornada cellebraránse delles presentaciones de sidre por parte los sos productores: l’alemán Jörg Geiger, de Manufactur Jörg Geiger ya’l llagareru asturianu Francisco Ordóñez de Viuda de Angelón, pela mañana; l’irlandés Eamon Lucey, de Stonewel, los letones Dace Smiltniece y Māris Plūme pela tardi. Tamién tendran llugar nel Pabellón de Congresos de la FIDMA dos interesantes charres “El papel de los hosteleros na prescripción de la sidre” a cargu de Mª José Oliveira -Sidraría Celta Endovélico- y Jaime Filipe Barros -Portal da Sidra- y un percorríu pela sidre chileno de man de Pascual Ibáñez, Sumiller autor de ‘Guía de la Sidra en Chile’.
Pa quien quiera entrar nun contautu más cercanu colos productores o cenciellamente quiera vivir esperiencies sidreres de calidá, hai un númberu llendau d’entraes disponibles pa compartir colos llagareros internacionales les espiches que se cellebrarán el vienres en Nava -Llagar de Sorribes- y mui especialmente, la tradicional espicha de xermandía que tendrá llugar en Xixón, nel Llagar del Trole.
Finalmente, comu eventu especialmente pensáu pa los gourmets más desixentes, sedrá posible -previa reserva y por rigurosu orde d’iscripción- participar nel Brunch de Gala que precederá la entrega de los Premios SISGA, nel Restaurante El Duque y nel que na mañana del domingu el reconocíu chef Pedro Baldó propondrá una riestra de maridaxes pente platos d’alta cocina y les sidres ganadores de los Premios SISGA, una esperiencia gastronómica perinteresante que sal de tolo avezao y demuestra comu la sidre pue satisfacer los paladares más esquisitos.
La participación presencial nel Brunch de Gala va tar llindada en cuanto al númberu participantes y tien un costu de 65 € por persona, entantu que’l costu de les espiches ye de 35 €. N’ambos casos, p’apuntase ye preciso ponese en contautu cola organización nel corréu fasturies21@gmail.com o nel teléfonu 684644711, siguiéndose un rigorosu orde d’iscripción fasta completar l’aforu.
Toes estes esperiencies son perinteresantes pa los mantes de la sidre en xeneral, pero mui especialmente pa los profesionales del seutor, que tendrán la oportunidá de contautar con esportadores y productores en direutu.
