Javier Garaña, presidente de l’Asociación Llanisca de Restoranes, Otea- Allares, y propietariu de la Sidrería Restorán El Cuera, representa’l compromisu de los hosteleros de Llanes cola sidre y cola Denominación d’Orixe Protexida.
LA SIDRA.- Javier entró nel ramu la hostelería nel añu 83, anque nun foi n’una sidrería, sinón nun pub. Anque camudó de trabayu, la so nueva ocupación tampoco nun lu llevó llueñe del sector hosteleru, trabayando con cocines y maquinaries, fasta que fai agora unos trenta años decidió montar xunto con dos amigos la Sidrería El Cuera.
En Llanes ye conocíu pol so defensa del sector, al mandu de Otea-Allares, l’Asociación Llanisca de Restoranes, y agora representa a los sos compañeros profesionales nel alcuerdu robláu ente la DOP Sidre d’Asturies y los hosteleros de Llanes pa promocionar la sidre más nuesa
¿Tienes dalguna preferencia al respective de la sidre?
La preferencia tien que ser siempres la basada na calidá. La sidre ye un productu por desgracia bien desconocíu inclusive pa los asturianos, creyemos que tola sidre ye igual y nun lo ye.
Hai munches diferencies y nós nel nuesu establecimientu siempres intentemos tener sidre de llagares que tuvieren producción propia de mazana, eso ye daqué importante pa nós.
Cuando escomenzó tola tema de la DOP y demás siempres toviemos pendientes d’ello.
Xunete al nuesu canal de whatsapp
