L’asociación Mexicanes n’Asturies entama la cellebración col finxu de recaldar fondos p’aidar a les víctimes de los terremotos.
LA SIDRA.- La empresa COEM Astur, “too pal mundiu la sidre” donó un echaor llétricu pa la cellebración del Díi de Muertos qu’entama l’asociación Mexicanes n’Asturies. El motivu del eventu ye recaldar fondos pa les víctimes de los terremotos que devastroan estremaes fasteres del país. El festexo rializaráse’l prósimu martes 31 d’ochobre nel espaciu cultural La Revoltosa (Juan Alonso 12 en Xixón) y con horariu de 19:00 a 22:00 hores. Les actividaes y esposiciones proyeutaes son:
- Auténticu altar del Díi de Muertos con ofrendes
- Representación teatral pa dexplicar la festividá y los sos ellementos más importantes
- Mariachi
- Catrines vivientes
- Cocina mexicana
- Sortéu con premios para recaldar fondos
Xustamente sortearáse -ente otros premios-, l’echaor llétricu de COEM Astur, que foi pintáu a man especialmente pa la ocasión. Hai de siñalar qu’esti “Isidrín”, como popularmente se lu conoz, ye’k númberu 1 de ventes nel mercáu y abondamente demandáu tanto pa llocales comerciales como pal llar. Amás, sigún siñalen dende l’asociación mexicana, representa una de les carauterístiques más importantes de la so hermandá: l’integrar estremaes manifestaciones culturales de dambos países. D’ende qu’esti echaro llétricu seya consideráu como un símbolu de la xunión d’Asturies y México amosando ellementos de dambes cultures: la sidre y el Díi de Muertos.
Y ye que la sidre tamién ta presente nesta cellebración mexicana. Munchos llares, n’especial los que tienen vínculos con Asturies -que nun son pocos-, avecen incluyir como ufrienda nel altar, sidre axampanao. El motivu obedez a qu’en fiestes y ocasiones especiales, la sidre ye la bébora cola que se brinda, como por exemplu en Navidá y Añu Nueu; y per ende, úfrese al ánima de difuntu pa qu’esfrute como lo facía na so vida terrenal.
“El Díi de Muertos ye la cellebracón de la identidá múltiple, de les diferencies que mos complementen y mos despliquen; de les nueses múltiples herencies. Ye tamién la cellebración de la memoria. Non la esaltación de la muerte, sí la cellebración de la vida. Porque n’ella, na so forma d’anguañu, nun se recuerda al muertu pola so muerte, sinon polo qu’en vida foi dexándomos… Cellebramos, entós, non la so ausencia, sinon la oportunidá de tener tao xuntos” desplica Mario Stalin Rodríguez, del Instituto Nacional de Antropología e Historia y quien redautó los testos que se representarán mañana.
