La ueb Premios Blogdeldía vien de reconocer el trabayu d’Ana María Viciosa, autora del blog sidreru ciderayalga.com
LA SIDRA.- Collaboraora de la revista LA SIDRA con artículos d’actualidá sidrera, parte del equipu del Salón Internacional de les Sidres de Gala -SISGA- dende va cuatro años, con llabores de periodismu, tradución ya interpretación, Ana María Viciosa ye una namorada de la sidre perbien conocía nel mundiu sidreru, qu’agora ve reconocíu’l so llabor en ciderayalga.com pola ueb Premios Blogdeldía.
Estos premios fain rescamplar aquellos blogs que cumplan los requisitos que viene darréu:
- Conteníu: los post tienen que tar bien redactaos, tener un conteníu orixinal y actualizase periódicamente.
- Participación: Tienen en cuenta’l númberu cometarios del blog y la so calidá (l’espam tien un efeutu negativu).
- Usabilidá: El blog tien que tar bien encadarmáu y toles seiciones tienen de ser de facil acesu.
- Diseñu: valorase la orixinalidá
- Votaciones: la opinión de los llectores ye tenío en cuenta.
El blog dedíca-y una interesante entrevista cuya llectura encamentamos, asina como’l so blog ciderayalga.com, y la so cuenta n’instagram @ciderayalga
Arriendes d’ello, dende LA SIDRA queremos da-y les más sentíes felicitaciones pol premiu algamáu, cola certeza de qu’a esti siguirán otros.
