La Rede Europea de Ciudaes de la Mazana y la Sidre –Cider Cities- empecipia les sos actividaes tres la firma del protocolu d’adhesión el pasáu mes de setiembre nel Conceyu de Xixón, cola Sra. alcaldesa Carmen Moriyón exerciendo de anfitriona
LA SIDRA.- Cider Cities, la denominación escoyida como marca pola Rede Europea de Ciudaes de la Mazana y la Sidre, nun perdió’l tiempu dende la hestórica firma del protocolu d’adhesión y nestos pocos meses vieno desendolcando toa una serie d’actividaes tendentes al so afitamientu, con iniciatives previstes pal presente añu, pero sobromanera colos güeyos puestos nel periodu 2025-2026 aprovechando les aídes europees a les Redes de Ciudaes Europees qu’acaben de ser convocaes.
Pa Marcos Abel Fernández, presidente de la Fundación Asturies XXI, entidá promotora de Cider Cities, lo principal tres la firma del protocolu foi la definición d’una fueya de ruta a siguir, escomenzando cola ellaboración d’un programa que contempla la regulación de la incorporación de nuevos miembros pa evitar un posible desequilibriu territorial que supondría –por casu- una escesiva representación asturiana, y empecipiar la presentación de Cider Cities a entidaes municipales y rexonales d’Estaos de la Unión Europea qu’entá nun cunten con representación na mesma o que la so representación resulta escasa.
Nestos meses Cider Cities aconceyó colos Cabildos de Gran Canaria y Tenerife y coles ciudades de Kuartango, Valleseco, Chelčice y Mičovice arriendes de los ayuntamientos asturianos de Xixón, Nava y Cangues d’Onís.
