El direutor Luis Benito García Desplica los resultaos algamaos desque se punxeron en marcha los estudios; y asegura que nesti añu y el prósimu van tener una proyeición social muncho más amplia, yá que fasta agora tuvieron condicionaos pol andanciu
LA SIDRA.- N’avientu de 2019 la Universidá d’Uviéu anunció l’aniciu de la Cátedra de la Sidre para la investigación, divulgación y formación “nel cultivu, el mediu ambiente o la cultura sidrera”. La istitución, amás, robló un alcuerdu pa la puesta en marcha d’esta Cátedra cola DOP Sidre d’Asturies. Un alcuerdu ente dambes entidaes que nació con vocación de serviciu públicu y coles mires de promocionar l’estudiu nel ámbetu de la produición, del consumu de sidre, la so repercusión socioeconómica o les implicaciones culturales venceyaes a ella.
¿Y qué ye lo que llogró la Cátedra de la Sidre nestos años? El so direutor, Luis Benito García, desplicó yá l’añu pasáu los estremaos oxetivos que se consiguieron el 2020, como la firma, al pie de la Conseyería d’Educación, de trés unidaes didáutiques nos ciclos d’infantil, primaria y secundaria, centraes na hestoria y la cultura sidrera. Tamién la collaboración col Archivu de Fontes Orales pa la Hestoria Social d’Asturies pa l’aniciu del fondu ‘La Memoria de la Sidre’, o la edición y espublización de los ‘Cuadiernos de la Cátedra de la Sidre’, cuyu oxetivu ye introducir a los alunos na hestoria, la cultura y la dimensión científica de la bébora asturiano.
