En cuentes de l’avezada Cena Gala, esti añu cellebraráse un Brunch de Gala
LA SIDRA.- Cola mesma filosofía, pero afayándose a les midíes sanitaries a les qu’0bliga l’andanciu del covid-19, el X SISGA cellebrará un Brunch de Gala, pal que se presentarán estremaes propuestes gastronómiques p’harmonizar coles sidres premiaes, demientres se dan a conocer cualos son los ganaores de los Premios SISGA y procederáse a entregar los correspuendientes premios, too ello con emisión online n’abierto, y con conexones en direutu a los llagareros que nun puen asistir al eventu.
La participación presencial nel Brunch de Gala tará llimitada en cuantes al númberu participantes, fadránse grupos de seyes presones per mesa, y les meses tarán separtaes ente sigo 2 metros, percuriando’l restu de midíes sanitaries estipulaes. Tendrá un costu de 35 € por presona, y p’apuntase al mesmu sedrá preciso ponese en contautu cola organización al corréu fasturies21@gmail.com siguiéndose un rigurosu orde d’iscripción fasta la fin d’aforu.
La propuesta gastronómica dirá de la man del Restorán El Duque, toa una garantía del bon facer, la calidá del productu presentáu,y les propuestes gastronómiques afayaes a la sidre, al cuntar con llagar propiu. Trátase d’un restorán de sobráu prestixu que cunta ente otres distinciones co la de Premiu Platu d’Oru de la Gastronomía Nacional 2016.
X SALÓN INTERNACIONAL DE LES SIDRES DE GALA SISGA’20 / PREMIOS SISGA
