La sidre natural esplumoso amonta la so promoción con seyes tasties en distintes llocalidaes del país
LA SIDRA.- A lo llargo d’esti branu la Denominación d’Orixe Sidre d’Asturies va realizar una serie d’actividaes que van contribuyir a consolidar la so espansión y el so asitiamientu de marca. El branu ye un momentu estupendu pa consumir esta triba de bébora, qu’amás combina maraviosamente cola gastronomía asturiana, dende arroces, pexes y mariscos o inclusive fabada. La presencia de turistes dexa que se llegue a un públicu foriatu que va poder nel so llugar d’orixe consumir tamién sidre natural esplumosa.
Por ello fadrán seis aciones en distintes poblaciones del país coles mires d’espublizar les virtúes d’esta bébora que ca vuelta cunta con más siguidores. Sedrán al aire llibre cuando les condiciones lo permitan, garantizando la distancia de seguranza, ufiertando xel hidroalcólico a los asistentes y respetando tolos protocolos establecíos poles autoridaes sanitaries. En ca ación podrán tastiase les sidres naturales esplumoses El Gaiteru Etiqueta Negra, EM, Poma Áurea, Pomarina, Prau Monga y Quelo.
La primer tastia va ser esti xueves nun espaciu singular como ye “El Tendedero de Redes” en Llanes, a les 20 hores y namás pa 40 presones sentaes y cola abonda distancia de seguranza. Aquelles persones que deseyen allegar tendrán de confirmar la so asistencia na Oficina Turismu de Llanes o nel mail eventos@gustatio.es enantes del miércoles a les 14 hores.
La selmana siguiente la Denominación d’Orixe va realizar dos degustaciones en tiendes delicatesen como son Coalla Gourmet de la cai San Antón en Xixón el martes 28, y Aramburu en Ribesella’l xueves 30 de xunetu, n’horariu de 18:30 a 21:30 hores.
Tamién se van realizar actividaes na Plaza’l Güevu de Villaviciosa’l martes 4 d’agostu, n’Avilés y na cai Gascona d’Uviéu’l xueves 27 d’agostu.
Con estes aciones preténdese dinamizar con responsabilidá un branu distintu, nel que la Sidre d’Asturies con Denominación d’Orixe quier ser protagonista al traviés de les sos sidres naturales esplumoses, fomentando’l so consumu harmonizando xintes y cenes, yá que ye una magnífica compañía dende’l aperitivu fasta’l postre.
