La Sidrería La Pumarada, Gascona – Uviéu, foi la escoyida nésta ocasión pa cellebrar una nueva edición de la tastia-degustación “Borbolles d’Asturies” qu’a lo llargo d’ésti branu y col patrociniu del Conseyu Regulador de la DOP “Sidra d’Asturies” y la direición y organización de Gustatio – Esperiencies Gastronómiques y Comunicación Gourmet viénse desendolcándose per estremaes llocalidaes de la xeografía asturiana.
LA SIDRA.- Les presones que primeramente s’inscribieron, bien telefónicamente o per e-mail van llegando y a la entrada del chigre un camareru indíca-yos que tien d’utilizase’l xel hidroalcólicu y el mázcaru, acompangándolos fasta’l llugar onde se diba cellebrar l’eventu.
L’espaciu taba perfechamente afechu pa que los asistentes pudieren tar sentaos cómodamente y guardando toos ellos ente sí la distancia interpresonal.
Con puntualidá inglesa a les 19,30 hores da empiezu l’actu de la tastia-degustación al cargu de David Fernández-Prada, Direutor de Gustatio y críticu gastronómicu, y qu’empecipia cola presentación de les presones convidaes al eventu, escomenzando por Carmen, Responsable de Comunicación de l’Asociación de Sidreríes de la C/ Gascona, y siguiendo por Daniel Ruiz, Xerente del Conseyu Regulador de la DOP “Sidre d’Asturies”, quien dirixen unes curties pallabres a los asistentes, principalmente pa estimar la so asistencia.
La tastia-degustación foi dirixía por David, que, al empar que se diben sirviendo les distintes sidres esplumoses oxetu de degustación, rializaba una piqueña desplicación de caúna d’elles, coles sos distintes formes d’ellaboración y toos aquellos datos que consideraba oportunu apurrir pa una meyor conocencia del productu que se taba tastiando.
Les sidres esplumoses que se sirvieron fueron les que vienen darréu:
- El Gaiteru Etiqueta Negra, del Grupu El Gaiteru, collecha 2018
- Pomarina, del Grupu El Gaiteru, collecha 2017
- Poma Áurea, del Grupu Trabanco, collecha 2017
- Emilio Martínez, de Martínez Sopeña Hnos, collecha 2017
- Prau Monga, de Vda. de Angelón, collecha 2017
- y d’últimes Solaya, de Quelo, collecha 2016. Esta sidre foi la ganadora nel añu 2020 a la meyor Sidre d’Asturies DOP na categoría de Sidre Esplumoso.
La tastia-degustación, tanto poles esplicaciones daes pol presentador de la mesma, como pola calidá de les sidres esplumoses que se sirvieron foi del total agradu de tolos asistentes, a los que, los aprosimao 60 minutos que duró fixéronse-yos inclusive curtios, estableciéndose a la fin un piqueñu turnu d’entrugues y una bien prestosa conversación, yá con mázcaru, ente dellos de los asistentes.
L’actu remató con unes pallabres per parte del Presidente de l’Asociación de Sidreríes de Gascona, Pedro Caramés, que estimó a la Organización qu’escoyera una de les sidreríes de dicha cai pa cellebrar esta tastia-degustación.
Raúl Moru Jaular.
