Siete restoranes locales van sirvir esti platu, amás de callos y fayuelos, demientres tola ponte festiva; de xacíu podrán acompangase con sidre
LA SIDRA.- Blimea cellebra del 6 al 9 d’avientu les populares Fiestes Gastronómiques de los Pimientos Rellenos, declaraes d’Interés Turísticu Rexonal. Un total de siete restoranes de la llocalidá y contorna van secundar estes xornaes gastronómiques, con más de cuarenta años de tradición, amenizadas por un programa d’actividaes festives demientres tola fin de selmana, entamaes pola sociedá de festexos La nuesa Señora de les Nieves, cola collaboración del Conceyu.
Fiel a una cellebración culinaria que sobresal nel calendariu gastronómicu de la cocina asturiana tradicional, la hostelería llocal va sirvir estos díis un menú compuestu por pimientos asaos o al fornu, rellenos de carne o bonitu, y acompangaos d’una ración de callos, de segundu platu, y fayuelos, de postre; too ello regáu con sidra. Los restoranes de Blimea y contorna van ufiertar el menú tantu na xinta como na cena, a un preciu que varia según l’establecimientu, pero que se mueve alrodiu los 23 euros per presona. Coles mesmes, ufiértase la opción de pidir individualmente’l platu de pimientos rellenos pa quien lo prefieran como alternativa al menú completu. Independientemente d’una o otra opción, encamiéntase acutar mesa primeramente en dalgún de los restoranes participantes qu’apaecen nel directoriu “Ónde comer” de la ueb del Conceyu https://www.smra.org/portada
Les xornaes gastronómiques de los Pimientos Rellenos van tar animaes demientres tola ponte festiva por un programa cultural y de fiestes qu’inclúi la entrega del gallardón Pimientu d’Oru a “Sofía la carnicera”, el vienres, a les 19 hores, nel cientru social de Blimea, en reconocencia a una llarga trayeutoria profesional desempeñada dende moza na llocalidá, nun actu que va tar amenizáu pela Banda de Música de Samartín.
