Los espertos despliquen cómo tratar la sidre.
LA SIDRA.- La masterclass d’echáu de sidre que tuvo llugar el domingu, demientres la postrer xornada de la feria de Santa Catalina de L.luarca, fixo fincapié na forma non yá d’echar, sinón de beber la sidre.
Pablo Álvarez, que resultó ganador nel Campionatu Oficial d’Echaores cellebráu’l mesmu díi, y Loreto García, veterana campeona asturiana d’echáu de sidre, despliquen que la mayor parte de les vegaes nin s’echa bien, nin se bebe como debiera.
En pallabres de Pablo Álvarez, pa saber echar sidre hai que saber apreciala, y eso consíguese swprendiendo a bebela. Ha de faese d’una sola vegada, pero adulces, non como si fuera un golpe tequila. Tien de tomase mentes que dure’l carbónicu, l’aguante de la sidre, yá que una vegada qu’ésti sume la sidre ta “muerto”.
Pela so parte, Loreto García, toa una istitución del echáu desque decidiera dedicase a ello profesionalmente en 1997, afirmó qu’hai bien poca cultura alrodiu la sidre y el so procesu d’echáu y tastia, polo que ye importante que se faigan esibiciones con profesionales. L’oxetivu ye llegar al mayor númberu posible de públicu y que l’echáu de sidre conviértase nun valor amestáu p’Asturies.
La sidre échase dende lo alto cola fin d’ameyorar les sos propiedaes, y nun ye lo mesmo echar una bébora que lleldó nun tonel de maera a otra que lo fixo n’una barrica d’aceru inosidable. Por ello, el so echáu tien ser distintu. Nel primer casu, pola porosidá de la maera, el remexu debe ser gruesu y el vasu tien d’asitiase en posición más vertical. Nel segundu casu, al tener más carbónicu, el remexu tien de ser más finu y sirvise adelantrando’l vasu.
