Los llagares siñalen que la collecha 2016 tuvo cantidá llimitada de mazana, pero de gran calidá.
LA SIDRA.- Les tres grandes carauterístiques que definen a la collecha de mazana asturiana de sidre 2016 son: una collecha carauterizada pola gran calidá de la mazana, una cantidá xusta -pero abondo p’abastecer les espeutratives de produición- y de mauración serondiega. Eses son les claves que definen a la collecha 2016 de mazana de sidre n’Asturies, una temporada qu’escomenzó a entamos d’ochobre y que los cuatro llagares de sidre de Mazana Seleicionada: Trabanco, Muñiz, Peñón y Foncueva, acaben de finar.
En comparanza cola collecha 2015, la d’esti añu destaca pola ellevada calidá de la mazana, y en consecuencia, siñalen, les espeutatives depositaes sobro la nueva sidre son bramente altes: “Al cuntar con perbona mazana, la sidre dulce que yá ta formientando ye de gran calidá. Ye una sidre con muncha fuercia, mui equillibrada… Cuntamos con una base perbona pa la sidre de la collecha 2016” desplicó José Manuel Riestra, presidente de la sidre de Mazana Seleicionaa y xerente de Sidra Muñiz.
Frente a la collecha 2015, una de les más curioses de les décades caberes nel país, la de 2016 carauterizóse por una cantidá xusta. Ye añu par y, per ende, la vecería sigue afeutando a los niveles de produición de les pumaraes asturianes. Si bien los sos efeutos son ca vegada menores nos llagares de sidre de Mazana Seleicionada, que dende va tiempu apuesten por incorporar nes sos propies pumaraes métodos de control y estabilización de la collecha.
