Propietarios d’estremaos viveros del país coinciden en que’l futuru al curtiu plazu ye esmolecedor, yá qu’apenes hai nueves pumaraes n’Asturies y namás mérquense árboles pa reposición, mentes que’l gruesu de les sos vientes van parar a Galicia, que ta apostando fuerte poles races de mazanes asturianes.
Llega l’iviernu y con elli, la dómina de llantar pumares, que son árboles de fueya caduca que se llanten a raigañu desnudu cuando nun tienen fueya. Al contrariu de lo que pue paecer al tratase d’Asturies, que la so fruta característico ye la mazana, cola que s’ellabora la bébora tradicional asturiana, ca añu que pasa, llántense menos pumares de sidre. Asina lo acoten los propietarios de distintos viveros del país que reconocen que lo que se viende n’Asturies ye “namás pa reposición”, mentes que los pidíos que se faen pa llantar nueves pumaraes son “práuticamente toos pa Galicia”. Tamos falando siempres de races acoyíes a la DOP, porque les otres “cuasique nin se llanten”.
