La delegación de la Revista LA SIDRA nel Festival Interceltique de Lorient necesitó bones cantidaes de Loic Raison, una de les sidres bretones más populares, pa llevar bien les cuasique cincu hores de gaiteros baxo’l sol
Si pa nosotros foi una preba de resistencia, nun queremos pensar lo que sedría pa los gaiteros y baillarinos asturianos desfilar col traxe’l país baxu’l calor ya ensin el consuelu de la sidre.
Foron tres los grupos asturianos que desfilaron, destacando pol so colloríu pente los sobrios traxes bretones -que nunca dexen de sosprender na so variedá de sombreros y tocaos femeninos-, los perasemeyaos kilts d’irlandeses ya escoceses y la discreta ropa de Cornualles.
Nel Cortizo, gaiteru bien conocíu polos avezaos de la Primer Sidre l’Añu, foi l’encargáu d’abanderar Asturies abriendo’l desfile coles banderes de toles naciones celtes. Más alantre, les gaites de Camín de Fierro y de la Banda Gaites de Castrillón resonaron con fuercia peles cais de Lorient, ante un públicu entregáu qu’aplaudió con ganes, sobre tou cuando los componentes del Grupu Balle Fitoria aparaben el desfile pa echar un baille.
Aparte de los músicos, Asturies tuvo presente tamién nel desfile d’equipos d’esportes, dientro la categoría de llucha céltica, na que s’inclui el nuesu equipu de baltu.
La Banda Gaites Camín de Fierro tornó a actuar na nueche d’ayeri, na Place des Nations Celtiques, recoyendo entusiastes aplausos pol so espectacular ya inesperáu repertoriu musical, nel qu’entemecen tradición con música y lletres actuales.
