Tasties, concursos y presentación de la Sidre de Xelu de Cortina.
LA SIDRA.- ¡Foi un nun parar! Asturies convirtióse n’un de los puntos con más actividá dientru de Salón de Gourmets que se lleva a cabu nel IFEMA de Madrid. El díi escomenzó con un armonizaxe de productos asturianos adscritos a Alimentos del Paraísu Natural siguíu de la degustación de les típiques marañuelas per parte de la Mancomunidá Cabu Peñes. Darréu rializóse ún de los actos más esperaos de la xornada: La presentación de “Sidreries d’Asturies, Calidá Natural”. N’esti intervinieron el direutor xeneral de Comerciu y Turismo Julio González Zapico y el presidente de OTEA, José Álvarez Almeida. Darréu David Fernández-Prada ufiertó una desplicación al públicu sobro lo que ye dicha marca de calidá y les cualidaes que los establecimientos tienen de cumplir pa llograr la reconocencia. Coles mesmes, espunxo diversos aspeutos rellacionaos sobro cómo consumir Sidre n’Asturies y fexo una demostración d’echar sidre na que participaron dellos de los asistentes.
González Zapico desplico a esti mediu de comunicación que la so intención al venir a esti salón yera da-y puxu a los empresarios y tamién a los productores. “Lo que queremos ye que la xente vuelva a los oríxenes, a la esencia, a lo natural, a Asturies!”. D’ende qu’el eslogan seya “Torna al Paradisu, ven a Asturies”.
Pela tardi hebio muncho más. A les trés llevóse a cabu una degustación d’embutíos El Cuco acompangaos con Poma Áurea de Trabanco. Una hora y media más tarde tocó’l turnu de prebar Corderu Xaldu de Astursabor. Tocantenes a premios, la revista Club de Gourmets gallardonó Coalla Gourmet como meyor tienda gastronómica nel Auditoriu principal del salón.
Y finalmente, el broche d’oru… d’Oru Vieyo” –podría dicise–, foi la presentación de la Sidre de Xelu de Cortina. Dicimos Oru Vieyo yá que Celestino Cortina desplicó al públicu que yera un de los matices de collor colos que podría considerase a esta bébora. Gran interés causó esta puesta de llargu na feria, una y bones munchos queríen tastiar esti nuevu productu. Amás d’ufiertar notes de tastia arumoses y gustatives a l’audiencia, tamién se realizó un armonizaxe con garrapiñada, castaña n’almíbre, Moscovita y foie d’Oca. Amiestos interesantes y distintos pa esta sidre que va siguir dando de qué falar. “Tamos ciertos de que ye un productu esportable y ye el nuesu interés faelo, pero claro, ensin desdexar nunca lo de casa” dixo Cortina pa concluyir.
