La representación asturiana nel Festival Intercélticu d’An Oriant fexo ayeri una perbona actuación na Nueche Intercéltica, ún de los eventos más representativos de les nueches bretones demientres el festival.
LA SIDRA.- Ta siendo una selmana perdura pa los esforciaos artistes que vienen cola delegación d’Asturies, con asgaya d’actuaciones demientres tola selmana: sábadu 6, domingu 7, martes 9, miércoles 10 y xueves 11, amás de les que faen nel Espace Marine pa’l públicu bretón de Lorient y de dellos cientros de la rodalada.
Sicasí ayeri, al empar que toles demás nueches intercéltiques y les tardes na carpa del Espace Marine, la banda gaites La Llaguna’l Torollu ya’l grupu baille Trebeyu dieron lo meyor de so nun espectáculu enllenu de movimientu, aición, lluz, emoción y fueos artificiales que consiguió nun dexar indiferente a naide y que fexo les delicies de los munchos visitantes que s’averaron a esfrutar del más intercultural de los conciertos.
Un añu más, la presencia asturiana déxase notar nesti festival intercélticu, y la sidre nun ye precisamente lo que menos destaca, cola carpa asturiana onde la sidre de Trabanco ca vegada cunta con más siguiores.
