Damián Cienfuegos del chigre Las Trés Andaricas concursó en Gourmetapa; mentes que los quesos asturianos El Beso del Rey Silu, Rey Silu colloráu y Casín d’El Vieyu Mundiu pasaron a la final del certame Meyor Quesu d’España.
LA SIDRA.- Salón de Gourmets nació coles mires de convertise nel principal eventu européu dedicáu a les delicatessens. “Los productos más anovadores y vanguardistes de la gastronomía mundial axúntense nesti espaciu onde productores y consumiores faen negociu y conocen lo más novedoso del seutor” siñalen dende la organización. Pero a lo llargo de los sos 30 años d’esistencia, tamién se convirtió nun escaparate pa esponer lo meyor de la gastronomía del Estáu.
Y xustamente güei ye’l dII nel qu’ Asturies participa n’ún de los concursos gastronómicos más importantes del Salón. Trátase del IV Campeonatu Gourmetapa Estrella de Galicia. El certame dividióse n’estremaes sesiones demientres los cuatro díis que dura l’eventu. Güei miércoles 6 d’abril tocó la vez a Damián Cienfuegos, del chigre restorán Las Trés Andaricas allugáu en Valdréu. La so tapa: risotto del Pitu Caleya. Escontra les 14:00 hores escomenzó a ellaborala y cuasique una hora dempués pudo presentala énte’l xuráu y asistentes. Sicasí, nun llogró xubir al podiu cola so creyación.
Per otru llau, trés son los quesos asturianos que pasaron a la final del Meyor Quesu d’España. Del Rey Silu son: Besu del Rey Silu y Rey Silu colloráu. Vieyu Mundiu col so quesu Casín foi’l tercer clasificáu. Anque esta quesería nun asistió al Salón, sí presentó’l so productu na zona gourmet destinada a tal efeutu. Mañana pela tardi vamos saber en qué llugar quedaron.
Amás de la sidre asturiano tamién allegaron a Salón de Gourmeta sidres de l’Asturies de Santillana, cheques, gallegues y vasques. Somarroza, Opra, Maeloc y Perritegi, respeutivamente. Toes coinciden en que’l mercáu de la sidre ta n’espansión y que d’ella hai que destacar el so calter de bébora natural.
En cuantes al seutor de la restauración, una vegada más Viri, del Llar de Viri, allegó a Salón de Gourmets. Hai de destacar la presencia del chef y empresariu César Román de la sidrería d’alta cocina A Cañada DELIC experience, que foi renagurada la selmana pasada en Madrid. Dichu establecimientu ellaboró una sidra propio con mazanes de la cuenca minera asturiana “La Penúltima” de la que vamos falar en prósimes espublizaciones.
